Kommunini suliassaqarfiit
Kommunit pillugit
KANUKOKA-mit
Pikkorissarnerit ataatsimiinnerillu
17.07.2012 Forvaltningsret 10.10.2012 Ingerlatsinermut inatsisit Kvalitet i sagsbehandling Lederkursus for skoleledere Personlig udvikling

KANUKOKA-p tusarniaanermut akissutaa

Nuuk, 05.08.2004

Angallannermut tunngatillugu politikkikkut nassuiaat

Naalakkersuisut Angallannermut tunngatillugu politikkikkut nassuiaataat 2004 tusarniaassutigineqartoq KANUKOKA’p tiguaa.

Siunissami angallannikkut pilersaarusiornermi sinaakkusiussat
Angallannermut tunngasumik nassuiaatikkut siunertarineqarpoq inatsisartut ukiaru ataatsimiinneranni angallanermut tunngasut tunngaviusumik aalajangiiffigineqassasut nunatsinni angallassinermik ingerlatallit angallassissutinillu atuisut siunnissaq ungasinnerusoq isigalugu pilersaarusiuunneqarnissaat qulakkeerlugu.

Siunissami angallannikkut ingerlatsinissamik aalajangiinissaq 2004-mut aningaasanut inatsit naapertorlugu aningaasatigut sinaakkusiussat iluanni pisussatut naatsorsuutigineqarpoq, tamatumani angallannikkut ingerlatsinermut tapiissutit 2005-imiit 35 mio. kr.-nik taavalu 2005-imiit 2007-imut aamma suli 55 mio. kr.-nik ikilisinneqassallutik. Pisaartugassat tungaatigut aamma naalakkersuisut erseqqissarpaat aningaasat atugassat killeqartut. Naalakkersuisut meeqqat atuarfiisa iluarsartuunnissaat allilernissaallu, inissiat tungaat pilersuinerullu tungaa salliutillugit aningaasaliiffigerusuppaat angallannerullu tungaatigut pisaartugassanut aningaasaliissutaasartut aningaasaliissutinut nunamut tamarmut iluaqutaasussanut killilerumallugit.

Suliat Naalakkersuisut ingerlataat arlalippassuit nunap inuisa inuussutissarsiutillu sumi eqiterunnissaannut pingaaruteqartussarujussuartut, taamalu angallannermut tunngasut qanoq ittut siunissami atorumaneqarnissaannut pingaaruteqartussatut ilimagineqarput. Angallannermut tunngasumik nassuiaammi taaneqartut ilaatigut tassaapput:

  • Naalakkersuisut nunamut tamarmut pilersaarusiornikkut nassuiaateqalersaarnerat angallannikkut politikkip aammalu immikkoortut allat ataasiakkaat, assersuutigalugu peqqinnissaqarnerup tungaata ilinniartitaanerullu tungaata ataqatigiissaarneqarnissaannik qulakkeerisumik.
  • Inuussutissarsiornikkkut ineriartortitsinermut tunngatillugu peqatigiilluni ataatsimiititaliat nalunaarutaat,
  • Siunissami kommunit aaqqissuussaanissaannut suliassallu kommunit aamma Namminersornerullutik Oqartussat akornanni agguaanneqarnissaannut tunngatillugu Aaqqissuussaanermik isumalioqatigissitani suliaq massakkut ingerlanneqartoq,
  • Namminersulernissamik ataatsimiititaliarsuup sulinera

    Tamakku saniatigut Naalakkersuisut angallannerup tungaatigut pilersaarutaat angallassinermik ingerlatseqatigiiffiit timmisartunik nutaanik allanik pisinissaminnik pilersaarutaannut il.il. ataqatigiissinneqartussaapput.

    KANUKOKA’p ataatsimut isiginnilluni oqaatigiumasai
    Angallanneq pillugu Kangerlussuarmi aggustimi 2003 isumattorsaqatigiinnerup kingorna kommunit siunissami qanoq aaqqissuussinissamik ataatsimoortitamik aammalu Kalaallit Nunaanni angallanikkut ataqatigiissumik aaqqissuussinissamik takusassinneqarumallutik kissaateqarput.

    KANUKOKA isumaqarpoq siunissami angallannikkut aaqqissuussinissamut periarfissat allarpassuit Naalakkersuisut nassuiaasiaminni nutaami suli saqqummiussimanngikkaat, taamaaliornikkummi ileqqaarniutit siunissami angallannikkut aningassaliissutaasinnaasut kommuninut nunallu immikkoortuinut ataasiakkaanut kingunerisassaat kommuninit takuneqarsinnaalissagaluarmata.

    Naalakkersuisut siunissami angallannikkut aaqqissuussinissatut takorluugaat angallannermut tunngasumik 2004-mi nalunaarusiap erseqqinnerulersinngilai. Siunissami misissuinissat amerlassusii annertussusiilu qumartinneqarsimasorinanngillat imaluunniit takulertoruminarnerulersimanatik. Aamma siunniunneqarpoq pingaarutilinnik aalajangiisoqartinnagu misissuinissat nutaat utaqqeqqaarneqassasut.

    Siunnersuutit sorliit suliaralugit ingerlateqqinneqassanersut, aammalu siunissami misissuinissat sinaakkusiussat suut iluanni ingerlanneqassanersut ersersillugit Naalakkersuisut angallannerup tungaatigut pilersaarutit pillugit erseqqinnerusumik saqqummiinissaat KANUKOKA’p amigaatigaa.

    Aalajangersimasunut tunngatillugit oqaatigiumasat
    Kommunini nunallu immikkoortuini ataasiakkaani ineriartornermut tunngatillugit oqaatigineqartunut atatillugu tusarniaanermut kommunit ataasiakkaarlutik akissutaat takoqqussavavut. Taamaattorli KANUKOKA isumaqarpoq angallannermut tunngatillugu nassuiaammi Avannaani Qeqqanilu ineriartorneq salliutillugu ukkanneqartoq, akerlianik Kujataani Tunumilu ineriartornikkut ilimagineqartut tunulliunneqarlutik.

    Ilaatigut meeqqat atuarfiisa inissiallu tungaasigut aningaasaliissutissat salliutinnissaannut akissaqarumalluni inuiaqatigiit aningaasaqarniarneranni imminnut akilersinnaasut aningaasaliissuteqarfigisarnissaata kisimi ingerlateqqinnissaanik Naalakkersuisut kissaataat KANUKOKA’p isumaqatigaa. Taamaattumik KANUKOKA’p siunnersuutigaa siunissami misissuisarnissani atortut pioreersut kisiisa atorlugit angallannikkut isumaginninnissaq annerusumik ukkanneqartassasoq.

    •