Assigiimmik akeqartitsinermik allanngortitsiniarneq

Una tooruk KANUKOKA-p tusarniaanermut akissutaa atuarumallugu

Aningaasaqarnermut Pisortaqarfik ulloq 16. juuli 2004 nassiussaqarpoq assigiimmik akeqartitsineq pillugu nalunaarusiamik ima qulequtaqartumik: "Innaallagissamut, imermut kiassarnermullu assigiimmik akeqartitsinerup atorunnaartinneqarnissaanut iliuuserisassatut pilersaarummut aammalu naleqqatigiissaarinermik aaqqissuussinermut siunnersuummut tusarniaassut". Nalunaarusiaq kommuninut tamanut KANUKOKA-mullu nassiunneqarpoq. Quppernerup matuma ataani pineqarsinnaavoq.

KANUKOKA-p matumuuna siunnersuutigaa kommunit tamarmik immikkut toqqaannartumik Naalakkersuisunut akissuteqassasut, akissutimik kopiivinik KANUKOKA ilisimatiinnarlugu.

Taasariaqarportaaq assigiimmik akeqartitsinerup allanngortitsinissap siunnersuutigineqartup kingunerisassaanik ataatsimoortumik tapiissutit iluarsineqarnissaannik suli isumaqatigiinniartoqalinngimmat. Ataatsimoortumik tapiissutissanik isumaqatigiissummi 22. juuni 2004-meersumi KANUKOKA-p Naalakkersuisullu isumaqatigiissutigaat assigiimmik akeqartitsinerup allanngortinneqarnissaa inatsisartut aalajangiutissagaluarpassuk ataatsimoortumik tapiissutissat isumaqatigiinniutigeqqinneqarumaartut. KANUKOKA-p ilimagaa assigiimmik akeqartitsineq allannguuteqartinneqassagaluarpat 2005-imi ataatsimoortumik tapiissutissat iluarsineqarumaartut kommunit innaallagissamut, imermut kiassarnermullu kiisalu pisariaqartitsineq naapertorlugu ikiorsiissuteqartarnermut aningaasartuutaat amerlillutilluunniit ikilissagaluarpata assigiimmik akeqartitsinerup allanngortinneqarneranik pissuteqartinneqarsinnaasunik.

Tamanna Namminersornerullutik Oqartussat KANUKOKA-llu ataatsimoortumik tapiissutissat pillugit isumaqatigiissutaanni ima oqaasertaligaavoq:
Naalakkersuisut assigiimmik akeqartitsinerup nutarterneqarnissaanik siunnersuut Inatsisartut 2004-mi ukiakkut ataatsimiinnissaanni saqqummiunniarpaat. Illua’tungeriit isumaqatigiipput assigiimmik akeqartitsinerup nutarterneqarnissaa Inatsisartut akuerissappassuk taava kommuninut ataatsimoortumik tapiissutissat isumaqatigiinniutigeqqinneqassasut, taamaalillutik kommunit ataasiakkaarlutik assigiimmik akeqartitsinerup nutarterneratigut atuinertik allanngortinnagu 2005-imi aningaasartuutaasa allissutissaat millissutissaallu ataatsimoortumik tapiissutitigut naligiissarneqarniassammata.

Allannguineq kommunini ataasiakkaani atuineq tassanilu innaallagissamik, imermik kiassarnermillu atuinermut ataatsimoortumik aningaasartuutit apeqqutaallutik assigiinngitsumik sunniuttussaavoq. Taamaattumik illua’tungeriit isumaqatigiipput kommuninut ataasiakkaanut 2005-imut ataatsimoortumik tapiissutit allannguutissaat naligiissarsinnaajumallugit ataatsimoortumik tapiissutissat allannguutissaat kommunit ataasiakkaarlugit aaqqissuussaanermut tapiissutisiaannut immikkoortiterlugu agguaattariaqassasoq. Ilaliussaq 3-p takutippaa Namminersornerullutik Oqartussanit naatsorsukkat maannakkut pigineqartut tunngavigalugit naatsorsuinissamut assersuut.

Illua’tungeriit 2009 tikillugu kommuninut, assigiimmik akeqartitsinerup nutarterneqarneratigut aningaasartuuteqarnerulersunut, ataatsimoortumik tapiissutit qaffattariaqartassavaat. Naalakkersuisut Inatsisartunut siunnersuutiginiarpaat assigiimmik akeqartitsinerup nutarterneqarnerata sunniutai 2007-imi nalilersoqqullugit, aammalu kommuninut sunniutaat nutarterinerup Inatsisartunit nalilerneqarnissaanut tunngavissanut ilanngunneqassasut. Naalakkersuisut Inatsisartunut siunnersuutiginiarpaat tamatuma kingorna isummerfigeqqullugu nutarterineq 2009-p kingornagut qanoq ingerlateqqinneqassanersoq.

Assigiimmik akeqartitsinerup nutarterneqarnissaa Inatsisartut akuerissappassuk illua’tungeriit isumaqatigiipput assigiimmik akeqartitsinerup nutarterneqarnerata nassataanik ataatsimoortumik tapiissutit siunissani iluarsiissuteqarfigineqartarnissaata naatsorsornissaannut tunngavissanut ilanngullugu, kommunit pilersuissutinik 2004-mi atuinerat naatsorsorlugu kommunit atuinerat malitseqartinniarlugu. Illua’tungeriit aamma isumaqatigiipput pisariaqavissuinnarnut ikiorsiissutinut aningaasartuutinut sunniutit, assigiimmik akeqartitsinerup nutarterneqarneranik toqqaannartumik peqquteqartinneqarsinnaasut, misissorumallugit.

Ataatsimoortumik tapiissutissat pillugit isumaqatigiissut tamakkerlugu KANUKOKA-p nittartagaani atuarneqarsinnaavoq. Aamma budgetiliornermut ilitsersuutit aappaanni KANUKOKA-p nittartagaani atuarneqarsinnaasumittaaq nassuiaatigineqarput assigiimmik akeqartitsinerup allanngortinneqarnissaata akileraartarnerullu aaqqissuuteqqinneqarnissaata kommuninut aningaasatigut kingunerisassai.