KANUKOKA-p tusarniaanermut akissutaa

Nuuk, 10.08.2004

”Innaallagissap, erngup kiassarnerullu assigiimmik akeqartinnerisa allanngortinnissaannut pilersaarusiaq naligiissaarinissarlu” pillugit nalunaarusiaq KANUKOKA’p tigusimalerpaa.

Paasissutissanik amerlanerusunik pisariaqartitsineq
KANUKOKA isumaqarpoq nalunaarummi assigiimmik akeqartitsinerup nutarteriffigineqarnerata kingunerisassai pillugit paasissutissat amigartut, taakkununnga ilanngullugit inuit inuussutissarsiutillu eqiternerulernissaata, Naalakkersuisut siunnersuutaata peqqutissaqartiligassaata kingunerisassai. Ungasinnerusoq isigalugu ineriartornissaq atorfillit suleqatigiissitat nalunaarutaanni annikitsuaraannannguamik sammineqarpoq, ukkanneqarnerullutilli inoqutigiinni aningaasartuutinut, inuussutissarsiutinut, pisortanut Nukissiorfinnullu toqqaannartumik sunniutaajumaartut.

Naalakkersuisut naalakkersuisooqatigiinnissamut isumaqatigiissutaanni allassimavoq ”Naalakkersuisooqatigiit suliniutinik nunaqarfinni isorliunerusunilu inuuniarnermi atugassarisanut pingaarnerpaanut pitsanngorsaataasussamik ineriartornermut nakussassaataasinnaasunik siuarsaaniarput.” Tassa assigiinnik akeqartitsinerup nutarterneqarnissaanik siunnersuut naalakkersuisut akuerissappassuk naalakkersuisut siunniussaat allanngorsimassaaq.

Kommuninut toqqaannartumik sunniutissai
Naalakkersuisut KANUKOKA’llu ukiumut aningaasatigut pilersaarusiorfiusumut 2005-imut ataatsimoortumik tapiissutissat isumaqatigiissutigineranni aalajangiuppaat assigiimmik akeqartitsineq inatsisartut akuerissappassuk ataatsimoortumik tapiissutissat isumaqatigiinniutigeqqinneqassasut, assigiimmik akeqartitsinerup nutarterneqarnerata kommunit suliffeqarfiutaannut kiisalu pisortatigut ikiuisarnermut toqqaannartumik sunniutigiumaagaannik kommunit taamaalillutik immikkut nammagassinneqaqqunagit.

Nutarterinissakkut kommunit suliffeqarfiutaanni atuineq allanngunngippat tamakkunatigut kommuninut sunniutigissangatinneqartut atorfillit suleqatigiissitat nalunaarusiami tabel 8-imi takutippaat. Tabeli Nukissiorfiit naatsorsugaat tunngavigalugit suliaavoq. KANUKOKA isumaqarpoq sunniutaajumaartutut missiliuutigineqartut kommuninut taarsiissuteqarnissamut aallaavissatut atorneqarsinnaasut, kisiannili ilaatigut ukiunut assigiinngitsunut tunngatinneqartut eqqarsaatigalugit ajornartorsiutaanerat pissutigalugu kommunit aningaasartuutaasa kommunit naatsorsuutaat aallaavigalugit misissuataarneqartarnissaat pingaartuusoq.

Kommunit pisortat ikiuutigisartagaannut aningaasartuutaasa qanoq allanngussangatinneqarnerat nalunaarusiami naatsorsorneqarsimanngillat. Taamaattorli nutarterineq nalunaarusiami ersersinneqartutut piartuaartinneqassappat kommunit pisortat ikiuutigisartagaannut aningaasartuutaasa ukiumi siullermi amerlingaatsiarnissaat KANUKOKA’p ilimaginngilaa. Taamaattorli kommunit aningaasartuutaasa kommunit naatsorsuutaat tunngavigalugit malittarineqartuarnissaat kommuninut pingaartuuvoq.

Kommunit pisortat ikiuutigisartagaannut suliffeqarfiillu ingerlanneqarnerinut aningaasartuutaasa allannguutigiumaagaat aatsaat 2005-imut naatsorsuutini takuneqarsinnaalissapput, tassa kommunit kontonut immikkoortiterisarnerat iluarsartuunneqaqqaartariaqassammat.

Allatigut kommuninut sunniutaasussat
Assigiimmik akeqartitsinerup allanngortinneqarnera toqqaannartumik sunniutaajumaartut saniatigut allatigut arlalissuartiguttaaq sunniuttussaavoq kommunit aningaasaqarniarnerannut assut pingaaruteqartussanik. Taama allanngortitsineq assersuutigalugu kommunini ataasiakkaani innuttaasut aningaasanut pisissutigisinnaasaannut assigiinngitsumik sunniuttussaavoq, taamalu siunissami ingerlatatigut aammalu kommunit ataasiakkaat siunissami akileraarutitigut isertittagassaannut pingaaruteqartussaalluni. Nutarterineq ungasinnerusoq isigalugu inuit inuussutissarsiutillu nunaqarfinniit illoqarfinniillu minnerusuniit illoqarfinnut annerusunut ingerlaalernerannik kinguneqarsinnaavoq.

Assigiimmik akeqartitsinerup nutarterneqarnissaata inuit inuussutissarsiutillu qanoq annertutigisumik eqiterneqalernissaannik naalakkersuisut kinguneqassangatinneraat nalunaarusiami sammineqanngilaq. Naalakkersuisut assigiimmik akeqartitsinerup kingunerisassaasa naatsorsorneqarneri pillugit 2005-imi Aningaasanut Inatsisissamut Siunnersuummi nalinginnaasumik nassuiaatini allassimapput: ”atuisut akinut qaffasinnerusunut appasinnerusunullu qanoq qisuariarumaarnerat nalilersoruminaammat naatsorssuinerit nalorninaateqartut. Nuna ataatsimut isigalugu aamma najukkani ataasiakkaani innuttaasunut, inoqutigiit aningaasartuutaannut suliffinnullu sunniutaajumaartut pitsaasut pitsaanngitsullu tamakkiisumik naatsorsornissaannut ullumikkut najoqqutassaqanngilaq”.

Sunniutaajumaartut naatsorsoruminaassinnaanerat KANUKOKA’p isumaqatigaa, taamaattorli isumaqarluni ineriartornerup illoqarfinnut annerusunut eqiternerulernerata sunniutigisinnaasaasa piffissaalluarallartillugu sillimaffigineqarnissaat pingaartuusoq. Suleqatigiissitat taasimavaat najukkani inuussutissarsiutinit qimagarneqartuni suliffissaaleqineq ajornartorsiutaalersinnaasoq, aammalu kommunini nutserfiusuni soorlu assersuutigalugu inissianik, paaqqinnittarfinni inissanik il.il. pisariaqartitsineq annerulersinnaasoq.

Ataatsimut isigalugu inerniliineq
KANUKOKA isumaqarpoq nutarterinissaq pisivisunngortinneqassagaluarpat tamanna pilersinnagu assigiimmik akeqartitsinermut tunngatillugu siunnersuutip inuit inuussutissarsiutillu eqiternerulernerannik kinguneqarsinnaanera pillugu paasissutissanik amerlanerusunik pisariaqartitsisoqartoq.

KANUKOKA aamma isumaqarpoq inuit inuussutissarsiutillu illoqarfinnut annerusunut nutsilerpata assigiimmik akeqartitsinerup nutarterneqarnerata allatigut sunniutigiumaagaasa passunnissaannut kommunit aamma Namminersornerullutik Oqartussat piareersimanissaat qulakkeerneqartariaqartoq.