21. decembari 2004
Tusarniaasitsinermut tunngasumik paasissutissat kommuninut nassiussorneqarsimapput, kommunillu tallimat tusarniaasitsinermut akissutaat tiguneqarput.
KANUKOKA’p atuagaateqarfeqarneq pillugu peqqussutip allannguutissaanut siunnersuummut isummani tusarniaasitsinermut tunngasumik paasissutissanut ilanngullugit saqqummiuppai. Kommunit tusarniaasitsinermut akissummini KANUKOKA’p isumai matuma ataani saqqummiunneqartut taperserpaat.
KANUKOKA’p allannguutissatut siunnersuut naleqquttuusoraa, taama akiliisitsisarnissamut il.il. ilumut inatsisitigut tunngavissaqarnersoq nalorninarunnaassammat.
KANUKOKA’p peqqussummut allannguutissatut siunnersuut tamatuma saniatigut imaattunik oqaasissaqarfigaa:
Atuakkat tammartut aserukkalluunniit il.il. taarsissutigisarnissaat
Peqqussutissatut siunnersuummi atuakkat tammartut aserukkalluunniit il.il. taarsissutigisarnissaat pillugu aalajangersakkanik immikkuualuttulersukkanik ilanngussisoqarsimanngilaq. Peqqussutissatut siunnersuummut oqaaseqaatit naapertorlugit tamakku pillugit aalajangersakkanik ilanngussisoqarsimanngilaq taarsiissuteqartarnissamik apeqqutit taarsiissuteqartarnermut maleruagassat nalinginnaasut malillugit aqunneqartussaammata.
Peqqussutissatut siunnersuummi akiliisitsisarneq immikkullu kiffartuussinermut akiliuteqartitsisarneq pillugu immikkuualuttulersukkanik aalajangersaasoqarsimammat imaaliallaannaq isumaqartoqalersinnaavoq atuisunut akiliisitsissutaasinnaasut taakkuinnaasut. Taamaattumik atuagaateqarfinni sulisut atuakkat tammarsimasut aserorneqarsimasulluunniit il.il. taarsiissutigitinnerini taarsiissuteqartarneq pillugu aalajangersakkat nalinginnaat atussagunikkik ilisimasariaqarpaat. KANUKOKA’p isumaa malillugu tamanna tulluartuunngilaq, taamaattumillu taarsiisitsinissamut periarfissaq atuagaateqarfeqarneq pillugu peqqussummi ilaatittariaqarluni, ilaatigut peqqussutip atuisunut piuminartuunissaa eqqarsaatigalugu.
Allilerinissamut pilersaarusiaq aamma atuagaateqarfeqarnermut pilersaarusiaq:
Atuagaateqarfeqarneq pillugu Inatsisartut peqqussutaanni nr. 4, 15. oktober 1979-imeersumi § 7, imm. 1-imi aalajangersagaq massakkut Kulturikkut ingerlatsineq sunngiffimmilu sammisaqartitsineq pillugit Inatsisartut peqqussutaanni nr. 10, 21. maj 2002-meersumi § 2, imm. 2-mi massakkut ilaatinneqarpoq, taamaattumillu § 7, imm. 1 peerneqarsinnaalluni. Atugaateqarfeqarnerup aqunneqarnera kulturikkut ingerlatsinermut sunngiffimmilu sammisassaqartitsinermut peqqussummi ilaatinneqarpoq, tassami peqqussutip taassuma Kulturikkut ingerlatsinerup atuartitsinerullu aqunneqarnerat pillugu Inatsisartut peqqussutaata nr. 8, 7. maj 1988-imeersup amiakkui atorunnaarsimmagit.
Godthåb Kommune:
Atuagaateqarfeqarneq pillugu Inatsisartut peqqussutaanni nr. 4, 15. oktober 1979-imeersumi paragraffit naapertorlugit "Godthåb kommune" allanngortinneqassaaq imaalersillugu: "Nuup Kommunea":
§ 3, imm. 2
§ 7, imm. 2
§ 8
Kulturikkut ingerlatsinermut atuartitsinermullu qullersaqarfik:
Atuagaateqarfeqarneq pillugu Inatsisartut peqqussutaanni nr. 4, 15. oktober 1979-imeersumi paragraffit naapertorlugit "Kulturikkut ingerlatsinermut atuartitsinermullu qullersaqarfik" allanngortinneqassaaq imaalersillugu: "Naalakkersuisut".
§ 6, imm. 1
§ 10
§ 13
Peqqussutip allanngortinnissaanut taarsiullugu nutaamik peqqussusiorneq
Atuagaateqarfeqarneq pillugu Inatsisartut peqqussutaat nr. 4, 15. oktober 1979-imeersoq Atuagaateqarfeqarneq pillugu Inatsisartut peqqussutaata allanngortinneqarnissaanik Inatsisartut peqqussutaat nr. 13, 30. oktober 1992-imeersoq aqqutigalugu allanngortinneqareerpoq. Allannguutissatut siunnersuutaasut aammalu suli allanngortitseqqinnissamik pisariaqartitsineq – takuuk qulaaniittoq – atuagaateqarfeqarneq pillugu peqqussut, peqqussutit assigiinngitsut pingasut aalajangersagartaat kattussorneqassappata, paasiuminaallissaaq.
Taamaattumik nutaamik, peqqussutinik 1979-imeersumik 1992-imeersumillu atorunnaarsitsisumik pilersitsisoqarnissaa pisariaqarpoq.
