|
KANUKOKA-p tusarniaanermut akissutaa - una tooruk 23. august 2004
Kultureqarnermut, ilinniartitaanermut, ilisimatusarnermut ilageeqarnermullu Pisortaqarfiup allakkamini nr. 001901-ini 16. august 2004-meersuni Atuarfinni ingerlaavartumik naliliisarneq uppernarsaasiortarnerlu pillugit nalunaarusiassamut siunnersuut tusarniaassutigalugu nassiuppaa. Nalunaarusiassamut siunnersuut Atuarfinni iliuusissanut pilersaarusiat, ingerlaavartumik naliliisarneq uppernarsaasiortarnerlu pillugit nalunaarut nr. 13, 11. juni 2003-meersumut taarsiuttussaavoq. 2003-mi nalunaarummut naleqqiullugu allannguutit pingaarnerit tassaapput nukarliit atuarfiata (3. kl.) aamma akulliit atuarfiata (7. kl.) naammassinerini misilitsitsisarnissamik aalajangersakkat aamma klassit arfineq aappaanni aalajangersumik sammisaqarluni suliaqartalernissap atuarfiup iluani naliliinermut pinngitsoorani ilaasussanngortitaanera. Tamatuma saniatigut ataasiakkaanik erseqqissaateqarpoq aammalu oqaasertalersugaanera allanngortiterneqangaatsiarsimalluni. Nalunaarusiassatut siunnersuut 1. oktober 2004-miit 1.-7. klasseni atuartunut atuutilersussatut siunnersuutigineqarpoq, taamaattorli 3. aamma 7. klasset kingornisigut misilitsittarnissat aatsaat 2006-imi piviusunngortinneqartussatut eqqarsaataallutik. Massakkut 8.-12. klasseni atuartuusut atuarnertik meeqqat atuarfiat pillugu peqqussutitoqaq aammalu naliliisarnermik naggasiutaasumillu misilitsittarnermik aalajangersakkat tassunga atasut malillugit naammassiniassavaat. § 2: Aalajangersagaq nutaajuvoq aammalu atuarfiup iluani naliliisarnerup avataaniillu naliliisarnerup nalunaarusiassatut siunnersuummi paragraffiinut assigiinngitsunut atatillugit suuneri nassuiarneqarlutik. §7, imm. 3: Nalunaarummi 2003-meersumi § 7, imm. 6-imut naleqqiullugu maanna piumasarineqarpoq atuartitsiviusussatut pilersaarutigineqartut aamma naammassillugit atuartitsivigineqartut pillugit, aamma atuartup atuariartortarsimaneranut paasissutissat atuartitsissutinut ataasiakkaanut atuartitsissutinullu qanitariissunut tunngatinneqassasut. Tamanna siusinnersukkut KIIIP-imit allakkatigut nalunaarutigineqareerpoq. Taama atuartitsissutit ataasiakkaarlugit nalunaarsuisarnissamik piumasaq atuartitsinerup piffissat ilaanni atuartitsissutit assigiinngitsut akuleruutsillugit aamma aalajangersumik sammisaqarpalaartumik aaqqissuunneqartarnissaanik nalunaarummi aalajangersakkanut naapertuunnersoq suli apeqqutaajuarpoq. § 11: Paragraffip imarai qitiusumiit piareersakkanik nukarliit misilitsittarlugit avataaniit naliliisarneq aamma atuartup 3. klassemi nammineq suliaminik nukarliit atuarfianniinnermut naggasiutaasumik saqquummiisarneratigut atuarfiup iluani nalillisarneq pillugit aalajangersakkat. § 13: Paragraffip imarai qitiusumiit piareersakkanik akulliit misilitsittarlugit avataaniit naliliisarneq aamma atuartup akulliit atuarfianniinnermut naggasiutaasumik 7. klassemi nammineq suliaminik kiisalu 7. klassemi aalajangersumik sammisaqarluni suliaqartarlunilu saqqummiisarneratigut atuarfiup iluani naliliisarneq pillugit aalajangersakkat. § 14: Angajulliit atuarfiat eqqarsaatigalugu suli taamaallaat atuartitsissutini sorlerni aamma atuartitsissutini qanitariissuni sorlerni atuartitsinerup ingerlanneqarnera pillugu nalunaarusiortoqartarnissaanik, aamma angusat tunngavigalugit karakteriliineqartassanersoq aalajangersakkanik imaqarpoq. 10. klassep kingornagut naggasiutaasumik misilitsittarnissat siullermik 2008-mi ingerlanneqartussat pillugit aalajangersagaqanngilaq. Kapitalit 6 – 8 nutaajupput misilitsinnerit, aalajangersumik sammisaqarluni suliaqarnerit saqqummiussinerillu pillugit malittarisassanik erseqqinnerusunik imaqarlutik. § 16: Ilaanngitsoortitsisarnermik aalajangersakkat qiviaannarlugit isumatuutut oqaatigisariaqarput. Taamaattorli atuartoq atuartitsissumi atuartitsissutiniluunniit arlalinni eqqartorneqartuni atuarnermi ilarujussuani atuartinnneqarsimanngitsoq misilitsinnerni nalinginnaasuni, ilikkagassatut anguniagassaritinneqartut angusinnaassagaanni nalinginnaasumik atuarsimasuunissamik tunngaveqartuni, peqataassaguni amerlanertigut misilitsinnikkut naapertuutinngitsumik inissisimasartussaassaaq. Taamaattut tassaasinnaapput atuartut nunaqarfimmi atuarfimmi ilinniartitsisussaaleqineq pissutigalugu qallunaat tuluilluunniit oqaasiinik ukiumi ataatsimi arlalinniluunniit atuartinneqarsimanngitsut. Aamma tassaasinnaavoq atuartoq soorlu immaqa 4. klassep ingerlanerani Kalaallit Nunaannut nuussimasoq. Atuartoq taamaalilluni ukiuni siullerni pingasuni-sisamani kalaallisut atuartinneqarsimassanngilaq taamalu 7. klassemi atuartitsissummi tassani ukioqatimisulli peqataasinnaanera naatsorsuutigineqarsinnaassanani. Imm. 1 ilaneqarsinnaagaluarpoq atuartut taama ukiullit nalinginnaasumik atuartinneqartarnerannut naapertuuttumik malinnaasimanngitsut atuartutut immikkut ittumik atuartitaasutulli ilanngitsoortinneqarsinnaanngorlugit. Taamaalippat imm. 2 pisariaarutissagaluarpoq, aammalu eqaatsumik periaaseqarnissaq pisariaqartinneqartoq anguneqarsimassagaluarluni. § 18: 3. Nukarliit akulliillu naammassinerini misilitsittarnissat pillugit Inerisaaviup maannamut saqqummiuttarsimasaani taaneqarsimavoq taamaattut imarisamikkut annertussutsimikkullu nalinginnaasumik atuartitsinerup iluani naammassineqarsinnaanngorlugit aaqqissuunneqarsimassasut. Aamma suliassiissutinik allattariarsorluni suliaqarnerit taamaallaat Inerisaavimmit nalilerneqartassapput, taamaalereerpallu naliliineq tamanna atuarfimmut ingerlatinneqassaaq, atuartitsinerup ingerlanissaata pilersaarusioqqinnerani ilanngunneqassammat. Misilitsinnerit atuartup ilinniartitsisuanit censorinillu Pisortaqarfimmit toqqakkanit nalilersorneqartarnissaannik, aammalu Pisortaqarfiup misilitsinnerup ingerlanneqarnissaanut nalilersuinissamullu malittarisassanik aalajangersuisarnissaanik malittarisassatut siunnersuutigineqartutigut misilitsiseriaaseq meeqqat atuarfianni naggasiutaasumik misilitsittarnermut nalunngisatsinnut assingusoq soorluuna atulersinniarneqartoq. Nukarliit akulliillu misilitsittarnissaannut tamakkulu nalilerneqartarnissaannut periaatsimik pisariitsunnguamik nassaartoqartariaqaraluarpoq. §§ 19 – 25: Naatsorsuutigisariaqarpoq aalajangersumik sammisaqarluni suliaqarneq taassuminngalu saqqummiussineq 7. klassemi nalinginnaasumik atuartitsinerup iluani ingerlanneqassasut, aammalu tamanna nalinginnaasumik atuartitsinerup sinaakkutaasa iluanni aaqqissuunneqarlunilu ingerlanneqassasoq, taamalu ilinniartitsisut nal. akunnerinik allaffissornermillu immikkut atuinissamik pisariaqartitsisoqassanani. § 26: Naatsorsuutigisariaqarpoq nammineq sulianik saqqummiussineq 3. aamma 7. klassemi nalinginnaasumik atuartitsinerup iluani ingerlanneqassasut, aammalu tamanna nalinginnaasumik atuartitsinerup sinaakkutaasa iluanni aaqqissuunneqarlunilu ingerlanneqassasoq, taamalu ilinniartitsisut nal. akunnerinik allaffissornermillu immikkut atuinissamik pisariaqartitsisoqassanani. §§ 27 – 31: Napparsimasimasut misilitsinneqartarnissaannik aalajangersakkat nalinginnaasumik misilitsittarnerit ingerlanneqartarnerinik aalajangersakkatulli allaffissornikkut pisariitsuusariaqarput nalinginnaasumik atuartitsinermut sinaakkusiussat aaqqissuunneqarneratalu iluanni ingerlanneqarsinnaanngorlugit. §§ 32 - 33: Oqaasertaliornerisigut misilitsinnerit, aalajangersumik sammisaqarluni suliaqarnerit saqqummiussinerillu allaffissornikkut pillersaataasorujussuarmik ingerlanneqartarnissaat pasinarsisinneqarpoq, tamannalu pinngitsoorniartariaqarpoq. § 33-ip oqaasertaliornera allanngortittariaqaraluarpoq ”atuarfik” misilitsinnerit eqqartorneqartut ilaannik pisariaqartunik isumaginnittussanngortillugu. Atuarfiup pisortaa perorsaanermut allaffissornikkullu aqutsinermut akisussaasutut atuarfiup suliassanik pisariaqartunik naammassinninnissaanut soorunami akisussaavoq, kisianni Namminersornerullutik Oqartussat kommunip sulisitsisutut isumagisassaa tigusinnaanngilaa aalajangersorlugulu atuarfimmi suliassat ataasiakkaat kiarpiaap ingerlatissanerai. § 35: Paasissutissanik tamakkuninnga katersuitinnani atuarfinni allaffissornikkut aqutsissutissaq sapinngisamik utaqqineqaqqaartariaqaraluarpoq, taamaalippat katersuineq elektroniskiusumik nalunaaruteqartarnikkut pisinnaalissammat. Kommunit qinnuigineqarput nalunaarusiassatut siunnersuutip tusarniaassutigineqarneranut akissutissatik kingusinnerpaamik pingasunngornermi 15. september 2004 nassiuteqqullugit, taava KANUKOKA’p tusarniaanermut ataatsimoortumik akissutissaq tallimanngornermi 17. september 2004 Namminersornerullutik Oqartussanut tunniussinnaassammagu. Kommunit qinnuigineqarput KANUKOKA’p isumai qulaani ersersinneqartut isumaqatigineritik tusarniaanermut akissumminni oqaaseqarfigeqqullugit. Tamatuma saniatigut soorunami nalunaarusiassatut siunnersuummut kommunit oqaaseqaatigiumasaat allat tusarumaneqarput. |
