Pisortaqarfiup allakkamini nr. 001901-ini 16. august 2004-meersuni Atuarfinni ingerlaavartumik naliliisarneq uppernarsaasiortarnerlu pillugit nalunaarusiassamut siunnersuut tusarniaassutigalugu nassiuppaa tusarniaanermut akissuteqarfissaq 17. september 2004-mut killilerlugu. Tusarniaanermulli akissuteqarfissaq 24. august 2004 mail-ikkut allagaqarluni 22. september 2004-mut kinguartinneqarpoq.
Siunnersuut tusarniaassutigalugu kommuninut nassiussorneqarpoq, kommunillu qulit akissutaat tiguneqarsimalerput. Tusarniaassummut akissutit ilisimatitsissutitut ilanngunneqarput. Tusarniaasitsinermi takussutissat kommuninut nassiussorneqarmata KANUKOKA’p ilanngullugu allakkiaa 23. august 2004-meersoq akissuteqaatini arlalinni eqqaaneqartarsimavoq. Kommunit tusarniaassummut akissutaat tamakkiisumik paasineqarsinnaaqqullugit KANUKOKA’p ilanngullugu allakkiaata assilineqarnera aamma ilanngunneqarpoq.
Atuartitsinerup atuartitsissutit ataasiakkaarlugit pilersaarusiorneqartut naammassineqartullu eqqarsaatigalugit naatsorsorneqartarnissaanik, aammalu immikkoortuni misilitsitsisarnissat pillugit aalajangersakkat pillugit nalunaarusiassami § 7, imm. 3-mi aalajangersakkat akissuteqaatit amerlanersaanni ernumanartinneqarlutik eqqartorneqarput.
Atuartitsinerup atuartitsissutit ataasiakkaarlugit pilersaarusiorneqartut naammassineqartullu eqqarsaatigalugit naatsorsorneqartarnissaannut tunngatillugu erseqqissarneqarpoq taama immikkoortitsineq meeqqat atuarfiat pillugu peqqussummi atuartitsinerup atuartitsissutinut immikkoortiterlugu, aamma atuartitsissutinut immikkoortiternagu ingerlatsinerit nikerartinneqarnissaannik aalajangersakkanut, aammalu atuartitsinerup atuartut ataasiakkaat, aamma atuartitsissutini ataasiakkaani ilikkartitassatut siunniussat, aallaavigalugit pisarnissaannik aalajangersakkanut naleqqutinngilluinnartutut isigineqartoq. Taama naatsorsuineq klassemi atuartunut ataasiakkaanut assigiinngisitaartussaavoq, tassami atuartut ataasiakkaat namminneq iliuusissaminnut pilersaarutitik sapinngisamik pitsaanerpaamik naammassisinnaajumallugit ataatsimoortukkuutaartuni assigiinngitsuni peqataasartussaammata, taamalu atuartut ataasiakkaat arlalitsigut atuartitsissutini ataasiakkaani aamma atuartitsissutini imminnut asingusukkuutaani nal. akunnerini amerlaqatigiinngitsukuutaani peqataasariaqartassallutik. Atuartitsineq atuartitsissutit ataasiakkaarlugit pilersaarusiorneqartut naammassineqartullu eqqarsaatigalugit naatsorsorneqartassappata taava atuartunut ataasiakkaanut immikkoortiterilluni taamaaliortariaqartassaaq. Taava aamma atuartitsissutinut ataasiakkaanut immikkoortiternagu atuartitsineq naammassineqarsimasoq naatsorsorneqartassagaluarpat nal. akunnera atuartitsiffiusoq naammassineqartoq imaluunniit taamaatiinnarneqartoq atuartitsissummi aalajangersimasumiittorpiaanersoq naatsorsorneq ajornarluinnassaaq.
Assiliaq ilivitsoq takutissinnaajumallugu aamma taasariaqarpoq Pisortaqarfiup 18. november 2003-mi allakkiamini nalunaarutigimmagu nal. akunneri atuartitsiviusut taartaasumit ingerlanneqartut atuartitsinertut naammassisatut isigineqarsinnaanngitsut. Taama isiginninneq KANUKOKA’p akuersaarsinnaanngilluinnarpaa, tassami taartaasartut klasseni ataasiakkaani atuartitseqataasarnerat assigiinngisitaartorujussuummat.
Tassa taamaammat Pisortaqarfiup piumasaqaataa atuarfimmilu ulluinnarni pissusiviusut imminnut pissusissamisoortumik ataqatigiinngillat.
Siunnersuutigineqartoq nalunaarsuinerujussuarmik allaffissornikkut ingerlakkuminaatsumik, aamma iluaqutaanersoq takuneq ajornakusoortumik nassataqartussaavoq. Qularutissaanngitsumik ilinniartitsisut aammalu atuarfiup pisortaasa allaffimmiuisalu annikitsuunngitsumik piffissaajaatigisussaavaat.
Atuartitsinerup uppernarsaasiorneqarnerani pingaarnerpaat tassaasussaapput atuartut iliuusissaminnik pilersaarutaat ilikkarniagassatut siunniussat, aamma atuartut ataasiakkaat pisinnaasaat pisariaqartitaallu, tunngavigalugit suliarineqartartut, atuartut atuartinneqarnerminni pissarsiaannut sanilliullugit.
Aamma taama nalunaarsuisarnissamik piumasaqaammut tunngavigineqartoq meeqqat atuarfiat pillugu peqqussummi tassungalu oqaaseqaatini takuneq ajornakusoorpoq.
Nukarliit atuarfiata akulliillu atuarfiata kingornisigut misilitsittarnissat eqqarsaatigalugit nutarteriniarluni sulinermi aalajangiusimaneqarsimavoq taama immikkoortuni misilitsittoqartassasoq.
Immikkoortunili misilitsittarnissat pillugit Inerisaaviup maannamut nassuiaatigisaani taaneqarsimavoq taamaattut immersorneqarlutillu annertussuseqartinneqassasut atuartitsinerup nalinginnaasup iluani naammassineqarsinnaanngorlugit. Aamma allattariaqarsorluni misilitsinnermi suliat taamaallaat Inerisaavimmit nalilersorneqartassapput, kingornagullu atuarfik taama naliliinernik atuartitsinerup pilersaarusiorlugu ingerlateqqinnissaani ilanngunneqarsinnaasunik nassinneqartassalluni.
Nalunaarusiassamut missiliuutip oqaasertalersugaanera aallaavigissagaanni immikkoortuni misilitsitsisarnissaat naleqqutinngivissumik ilusilerneqarlutillu annertussuseqalersinnaanerat aarlerinartorujussuuvoq. Immikkoortuni misilitsitsisarnissat imarisamikut ingerlanneqarnermikkullu ulluinnarni atuartitsinerup ilassaannaatut ilannguttarnissaat aalajangiusimassallugu pingaartuuvoq. Aamma immikkoortuni misilitsitsisarnissat piareersarnissaannut, aammalu censoritut toqqakkatut atuunnissamut, ilinniartitsissunik atuivallaannginnissaq pingaartuuvoq, taamaanngippammi ilinniartitsisussat killeqareersut atuartitsinermit peertariaqartarsinnaammata. Aamma immikkoortuni misilitsitsisarnissat pilersaarusiornerinut ingerlanneqarnerinullu pisortanik allaffissornikkullu sulisorisanik atuivallaartoqannginnissaa naatsorsuutigisariaqarpoq, tamakkumi atuarfiup allaffissornikkut ingerlanneqarneranut perorsaanikkullu ineriartorneranut pisariaqartunut atorneqarnerusussaammata.
Tusarniassummut akissutini arlalissuarni oqaatigineqarpoq immikkoortuni allattariarsorluni misilitsittarnissat pingaartumik nukarliit atuarfiat eqqarsaatigalugu ulluinnarni atuartitsisarnermut aammalu atuartitsissutini ataasiakkaani ilikkartitassatut anguniakkanut, oqaluinnarluni pisinnaasatigut ingerlanneqarnerusartunut, akerliusorinartoq.
Immikkoortuni misilitsittarnerit ingerlanneqarlutillu immersorneqartariaqarput ulluinnarni atuartitsinerup ilassaanaatut ilanngunneqarsinnaanngorlugit, misilitsinnerit inerneri ingerlaavartumik naliliisarnermi aamma ilisimatusarnermut atatillugu atorneqarsinnaassallutik.
Immikkoortuni misilitsittarnerit atuartut namminneq suliaminnik saqqummiivigisaat, taamatullu 7. klassemi aalajangersumik sammisaqarluni suliaqarneq ilinniartitsisunik allaffimmiunillu immikkut aggersitsinngikkaluarluni ulluinnarni atuartitsinerup iluaniissinnaasariaqarput.
7. klassemi aalajangersumik samisaqarluni suliaqarneq eqqarsaatigalugu arlallit isumaqarput taamatut atuartitseriaatsip naliliinermi ilaalernissaa ajunngitsumik iliuusiusoq. Aalajangersumik sammisaqarluni suliaqarnerup ukiumi atuarfiusumi tassani ingerlanneqartussaareernera ernumanartinneqarpoq, tassa ukiup atuarfiusup pilersaarusiorneqarnerani naatsorsuutigereerneq ajornavissimammat. Aalajangersumik sammisaqarluni suliap ilusaata, imarisaasa ingerlanneqarneratalu ulluinnarni atuartitsinermut naleqqussarluinnarsimanissaat pingaarluinnarpoq. Aalajangersumik sammisaqarluni suliap ingerlanneqarnissaa atuarfinni ataasiakkaani annertuutigut nammineq ilusilersorneqarsinnaasariaqarpoq, atuarfinni klassenik arlalinnik ataatsimoortitsiffiusuni taama misilitsitsineq sivisuatsiamik piffissalerneqartariaqarmat atuartut atuagaateqarfimmik, perorsaanikkut sullissivimmik, internet’imik qarasaasianillu atuinerat atuarfimmi pineqartumi pissusiusunut naleqqussarneqarsinnaaqqullugu. Apeqqutaavoq aalajangersumik sammisaqarluni suliaqartitsinerup 7. klassemi pereertarnissaa naleqquttuunersoq, imaluunniit angajulliit atuarfianniittussatut naleqqunnerunnginnersoq.
Qulaani taaneqartut saniatigut nalunaarusiassamut missiliuummi aalajangersakkat atasiakkaat imatut oqaaseqarfigineqassapput:
§§ 9 aamma 10:
§ 9-p nalunaarummi 2003-meersumi § 8-mut naleqqiullugu allatut ilusilerneqarneratigut 1. aamma 2/3. klasseni naliliisarnerit assigiinngissutaarupput. Ilusissaatut siunnersuutigineqartoq aalajangiusimaneqassappat ajunnginneruvoq § 9 aamma § 10 ataatsimoortunngortikkaanni.
§ 12, imm. 3:
Oqaasertai imaalillugit allanngortinneqassasut siunnersuutigineqarpoq: Atuartoq piffissami tassani pisinnaasassani imm. 2-mi taaneqartuni ataatsimi arlalinniluunniit atuartinneqarsimanngippat tamanna nalunaarlugu allanneqassaaq.
§ 14:
Normulersuinikkut kukkuneqarpoq, taamalu imm. 2 marloriarlugu taaneqarsimalluni.
Angajulliit atuarfianni taamaallaat aalajangersarsimajuarpoq atuartitsissutini sorlerni atuartitsissutinilu imminnut assigiiaattuni sorlerni naliliisoqarlunilu killiffimmi karakteriliisoqartassasoq.
Aamma 10. klasseni naggasiutaasumik misilitsinnissanut tunngasunik takusassaqanngimmat ajuusaarnartinneqarpoq, naak misilitsinnissat tamakku atuartunut ullumikkut 7. klassemiittunut aatsaat 2008-mi pisussaagaluartut.
§ 16:
Ilaatinneqanngittarnissamik aalajangersakkat takuinnarlugit ajunngitsuusorinarput.
Taamaattorli atuartoq atuartitsissutit taagorneqartut ilaanni ataatsimi arlalinniluunniit atuarnerup ilangaatsiarsuani atuaqataasimanngitsoq nalinginnaasumik misilitsinnermi, ilikkartitassatut siunniussat angunissaannut atuartut nalinginnaasumik atuartitaasimanissaat naatsorsuutigalugu ingerlanneqartumi, peqataassaguni naapertuuttunik periarfissaqartussaassanngilaq. Taamaattut soorlu tassaasinnaapput atuartut nunaqarfimmi atuarfimmi qallunaat tuluilluunniit oqaasiinik ilinniartitsisussaaleqineq pissutigalugu ukiumi ataatsimi arlinniluunniit naammattumik pitsaassusilimmik atuartinneqarsimanngitsut. Aamma taamaattoq tassaasinnaavoq atuartoq soorlu assersuutigalugu 4. klassep ingerlanerani aatsaat Kalaallit Nunaannut nuussimasoq. Atuartoq taamaalilluni atuartuunermini ukiuni siullerni pingasuni-sisamani kalaallit oqaasiinik atuartitsinermi atuarsimassanngilaq taamalu 7. klassemi atuartitsissummi tassani taama ukiulinnut atuartitsinermi peqataasinnaasutut naatsorsuutigineqarsinnaassanani.
Imm. 1-imut ilanngunneqarsinnaavoq atuartut atuartitsinermi atuaqatigiinnut pineqartunut nalinginnaasumik atuartitsissutaasussamut naapertuuttumik peqataanngitsut atuartutut immikkut atuartinneqartartutulli ilaanngitsoortinneqarsinnaasut. Taamaalippat imm. 2 pisariaarutissaaq, eqaatsumillu periaaseqarnissaq pisariaqaroq anguneqarluni.
§ 18:
Misilitsinnerit atuartup ilinniartitsisuinit censorinillu toqqakkanit nalilersorneqartarnissaannik, aammalu Pisortaqarfiup misilitsinnerup ingerlanneqarnissaanut nalilersuinissamullu malittarisassanik aalajangersuisarnissaanik malittarisassatut siunnersuutigineqartutigut, misilitsitseriaaseq meeqqat atuarfianni naggasiutaasumik misilitsittarnermut nalunngisatsinnut assingusoq soorluuna atulersinniarneqartoq.
Tamanna eqqortuusinnaanngilaq, aamma immikkoortuni misilitsitsisarnissat ingerlanneqartarnissaannut nalilersorneqartarnissaannullu pisariitsumik ilusiliisoqartariaqarpoq.
§§ 19 – 25:
Naatsorsuutigisariaqarpoq aalajangersumik sammisaqarluni suliaqarneq taassuminngalu saqqummiussineq 7. klassemi nalinginnaasumik atuartitsinerup nalinginnaasup iluani ingerlanneqassasut, aammalu tamanna nalinginnaasumik atuartitsinerup nalinginnaasup iluani aaqqissuunneqarlunilu ingerlanneqassasoq, taamalu ilinniartitsisut nal. akunnerinik allaffissornermillu immikkut atuinissamik pisariaqartitsisoqassanani.
§ 26:
Naatsorsuutigisariaqarpoq nammineq sulianik saqqummiussineq 3. aamma 7. klassemi nalinginnaasumik atuartitsinerup iluani ingerlanneqassasut, aammalu tamanna nalinginnaasumik atuartitsinerup iluani aaqqissuunneqarlunilu ingerlanneqassasoq, taamalu ilinniartitsisut nal. akunnerinik allaffissornermillu immikkut atuinissamik pisariaqartitsisoqassanani.
§§ 27 – 31:
Napparsimasimasut misilitsinneqartarnissaannik aalajangersakkat nalinginnaasumik misilitsittarnerit ingerlanneqartarnerinik aalajangersakkatulli allaffissornikkut pisariitsuusariaqarput nalinginnaasumik atuartitsinerup aaqqissuunneqarneratalu iluanni ingerlanneqarsinnaanngorlugit.
§§ 32 - 33:
Oqaasertaliornerisigut misilitsinnerit, aalajangersumik sammisaqarluni suliaqarnerit saqqummiussinerillu allaffissornikkut pillersaataasorujussuarmik ingerlanneqartarnissaat pasinarsisinneqarpoq, tamannalu pinngitsoorniartariaqarpoq.
§ 33-ip oqaasertaliornera allanngortittariaqaraluarpoq "atuarfik" misilitsinnerit eqqartorneqartut ilaannik pisariaqartunik isumaginnittussanngortillugu. Atuarfiup pisortaa perorsaanermut allaffissornikkullu aqutsinermut akisussaasutut suliassanik pisariaqartunik atuarfiup naammassinninnissaanut soorunami akisussaavoq, kisianni Namminersornerullutik Oqartussat kommunip sulisitsisutut isumagisassaa tigusinnaanngilaa, aalajangersorlugulu atuarfimmi suliassat ataasiakkaat kiarpiaap ingerlatissanerai.
§ 35:
Paasissutissanik tamakkuninnga katersuitinnani atuarfinni allaffissornikkut aqutsissutissaq sapinngisamik utaqqineqaqqaartariaqaraluarpoq, taamaalippat katersuineq elektroniskiusumik nalunaaruteqartarnikkut pisinnaalissammat.
§ 37, imm. 3:
atuutilerfissatut siunnersuutigineqartoq piviusorsiortuunngilaq. Nalunaarusiassamut missiliuutip imaannaanngitsunik allannguuteqartinneqarnissaa naatsorsuutigineqarpoq, taamaattumillu nalunaarut naammassillugu qanittukkut nassiussorneqarsinnaassanani.
Nalunaarutip 2003-meersup ukiup atuarfiusup massakkut ingerlasup naanissaanut atuutsinneqaannarnissa ajornartorsiutitassaqarsorinanngilaq. Taava nalunaarutissaq nutaaq nassiussorneqarsinnaassaaq aalajangersakkat nutaat ukiup atuarfiusup tullissap pilersaarusiorneranut ilanngussornissaannut naammattumik piffissaqartitsilluni. Taamaattumik inassutigineqarpoq atuutilerfissaa tassaassasoq 1. august 2005.
Siusinnerusukkut atuutilersitsoqassagaluarpat taava aalajangersumik sammisaqarluni suliaq taamatullu immikkoortuni misilitsitsisarnissat qitiusumiit aalajangersarneqartut ukiumi atuarfiusumi 2004/05-imi ingerlanneqartariaqanngikkaluarput. Aalajangersumik sammisaqarluni suliaq atuarfinni, pilersaarusiornerminni tamatuma ilanngunnissaanut periarfissalinni, misiliutitut immaqa ingerlanneqarsinnaavoq.
Tamakku saniatigut tusarniaassummut kommuninit akissutit ilanngunneqartut takoqqussavavut, tamakkunani pineqartut aalajangersimasut pillugit immikkuualuttunik amerlanerusunik takusassaqarmat.
