|
11. januaari 2004
Pisortaqarfiup allakkami nr. 000034, 8. januaari 2004-meersukkut Ilinniagaqarnersiutit pillugit nalunaarummut siunnersuut tusarniaassutigalugu nassiussimavaa.
§ 30a pillugu: KANUKOKA-p Ilinniagaqarnersiutit pillugit Inatsisartut peqqussutaannut siunnersuutip tusarniaassutigineqarneranut akissutaani oqaatigineqartutut KANUKOKA tunngaviusumik isumaqarpoq sulisitsisumut tapiissutit ilinniarnerup naammassinerani taamaatiinnarneqarneraniluunniit unitsinneqarnerata ilinniartuuteqarnerup taamaasillunilu akissarsiaqartitsinerup taamaatinneqarnera malittariaqaraat. Allaffissornikkut pissutit tunngavigalugit qaammammut ilivitsumut tapiissutinik tunniussinissaq kissaatiginartinneqarpat, ilinniarnerup naaneranut ulluliussaq qaammatip 15-ianiusariaqarpoq siunnersuutigineqartutut 20-aniunani. Ilinniarneq qaammatip 15-iani siusinnerusukkulluunniit naammassineqarpat taamaatiinnarneqarpalluunniit, sulisitsisumut tapiissuteqartoqassanngilaq qaammammut pineqartumut. Ilinniarneq qaammatip 15-iata kingornatigut naammassineqarpat, sulisitsisumut tapiissutit qaammatip pineqartup naaneranut tunniunneqassapput. Tamatumuuna sulisitsisoq Namminersornerullutillu Oqartussat assigiimmik qulakkeerunneqassapput. Namminersornerullutik Oqartussat nalunaarummut siunnersuummi qaammatip 20-anik killeqartitsinermik suli ingerlatsinera, Namminersornerullutik Oqartussat aningaasatigut nalorninaatit annertunersaat sulisitsisumut tutsitsiniarnerattut taamaallaat paasineqarsinnaavoq assigiimmik nalorninaatinik nammaqatigiinnissaq salliutinnagu. § 64 pillugu: Nalunaarut 1. februaari 2004-mili atuutilertussatut siunnersuutigineqarpoq. Piaartumik atuutilertitsinissaq KANUKOKAp imatut paasivaa Namminersornerullutik Oqartussat takorlooraat allannguinerit inuussutissarsiutinut tunngaviusumik ilinniagaqartut eqqarsaatigalugit ulloq taanna aallarnerfigalugu atuutilissasut. KANUKOKAp 16. oktobari 2003-mi allakkani Inuutissarsiutitigut ilinniagaqarnermut sulisitsisut akiliutaat pillugit Inatsisartut inatsisaata allanngortinneqarneranik Inatsisartut inatsisissaannut siunnersuut Inatsisartut ukiakkut ataatsimiinnerannut saqqummiunneqartoq pillugu inuussutissarsiutinut tunngaviusumik ilinniagaqartunut ilinniagaqarnersiutinik taamak sukkatigisumik allanngortitsiniarneq pillugu nangaassuteqarnini oqaatigaa. Taamatummi allannguiniarneq Inuussutissarsiutinut tunngaviusumik ilinniakkani ilinniartut pillugit Isumaqatigiissummik isumaqatigiinniuteqarnissamik piumasaqaatitaqarmat, taamatullu allannguinermut sulisitsisut tapiissutaat aammalu aaqqissuussinermut allaffissornikkut ilusiusoq pillugit isumaqatigiissuteqarnissaq piumasaqaataasariaqarluni. Inuussutissartiutinut tunngaviusumik ilinniagaqartunut ilinniagaqarnersiutinik ilinniartullu akissarsiaannik allannguineq nalunaarutip atuutilerfianiit atuutitsilernissaq siunertarineqarpat, ulloq atuutilerfissaq KANUKOKAp akuerisinnaanngilaa. Ilanngullugulu oqaatigineqassaaq kommunit sulisitsisutut sinnerlugit KANUKOKA sulisitsisut tapiissutaasa annertussusiata aalajangersaavigineqarnissaanik aammalu aaqqissuussinermut allaffissornikkut periutsip sulissutigineqarnerisa ingerlaqqinneranni peqataatinneqarnissani naatsorsuutigimmagu. |
