|
Una tooruk KANUKOKA-p tusarniaanermut akissutaa atuarumallugu
Siunnersortip Karl Nielsenip atuarfeqarfinni pisortanut allagaa. Nassuiaat ilanngussallu quppernerup matuma ataani aaneqarsinnaapput.
2002-p ukiaani, taamani naalakkersuisunut ilaasortaasup Lise Lennertip suliakkiissuteqarnera naapertorlugu ilinniartitsisunngorniartarneq nalilersuivigineqaqqaarmat KANUKOKA sinnerlugu peqataavunga. 2003-ip aallartilaarnerani suleqatigiisitamut suliakkiissut nutarterneqarpoq peqataanillu KANUKOKA IMAK-ilu sinniisuerutsinneqarlutik.
Suleqatigiisitami siullermi KANUKOKA-p erseqqissarpaa, Kalaallit Nunaata atuarfeqarfii sinnerlugit qulakkeerneqassasoq, ilinniartitsisunngorniartarnerup pitsaasuunissaa ilinniartitsissutigineqartartunullu amerlanerpaanut ilinniartitsisinnaasut qulakkeerneqarnissaat. Ilinniartitsissutigineqartartunut piginnaasaqarluarnissaq angisuumik pingaaruteqarpoq, nunaqarfinni atuarfiit ataasiinnarmik marlussuinnannguanilluunniit ilinniartitsisoqartartut eqqarsaatigalugit, siammasissumillu piginnaasaqarnissaq aamma pingaarpoq, illoqarfinni atuarfiit pingasoqiusanngorlugit avinneqarsimanerat eqqarsaatigalugu ilinniartitsisut allariarfinni ataasiakkaani ikittarmata, alloriarfinni tamani tamakkiisumik ilinniartitsinissamik pisussaaffillit.
Ilinniartitsisunngorniartut ikippallaanut ilinniartitsartussanngorlugit aaqqissuussissanngilagut, soorlu Danmarkimisut tappavanimi faginut sisamaannartut ilinniartitsisunngorniat ilinniartitsisartussanngorlugit ilinniartinneqartarput.
Nassuiaatip suliarisimaneranut atatillugu makkunannga uparuaatissaqarpunga:
Isumaqarpunga, ilinniartitsisunngorniartarnermut aaqqissuussinissamut siunnerssuutaasoq pitsaasoq, siunnersuutigineqartumi pitsaasumik ataqatigiisinneqarmata, ilinniartitsisunngorniat ilinniartitsissutigineqartartut ilaannut immikkut piginnaanngorsartalernissaannut kissaateqarneq aammalu sapinngisamik ilinniartitsissutigineqartartunut amerlanerpaanut piginnaanngorsartitsisarnissamik pisariaqartitsineq, atuarfeqarnerup maannakkut aaqqissuussaanera qissimikkaanni piginnaaneqarfigisariaqakkat taakku avaqqunneqarsinnaanngimmata – nunaqarfinni atuarfiit ilinniartitsisukinnera illoqarfinnilu atuarfinni ilinniartitsisut ataatsikkut ilinniartitsisalernissaat pissutigalugu.
Ilinniarnermut atatillugu sungiusaatigalugu sulisarnerup nukittorsarneqarnerat kiisalu Ilinniarnermut atatillugu sungiusaatigalugu sulisarnerup, fagit ilinniartitsisunngorniarfiit perorsaanermullu tunngassuteqartut sammisassat kusanartumik kusanartutut taasariaqarput (qupp. 23).
Inuttut ineriartornermi immikkut piginnaanngorsartarnermut tunngasumi titarnertaami (qupp. 23 - 24) isumaqarpunga iluseqartoq immikkut piginnaanngorsarfiusinnaasussatut paasinarnerullunili ilinniaqqissinnaanertut – soorlu psykologi-mi PD-mut. Ilinniartitsisunngorniartarnermut ilanngunneqassappat ima imartutigissaaq allaat immikkut piginnaanngorsarfigisassamik inagiissalluni.
Naafferartumik ilinniartitsisunngorniartarnissaq annikitsumik tunuliaqutaqartumik ilinniartitsisunngorniartarnissamut periarfissiisorinarpoq. Nassuiaammi perorsaanerup atitussusaa kisimi sammineqarpoq. Taamaassappat ilinniartitsisut allat pilersinneqartartussassapput.
Meeqqat atuarfii pillugit peqqussummi allaqqasoq, ilinniartitsisut ” meeqqat atuarfianni ilinniartitsisunngornissamut ilinniarsimanissaat piumasaqaataavoq” eqqortinneqassappat, arlaatigut killeqartinneqartariaqarpoq ilinniartitsisunngorniarnerup ilaata qanoq angitigisup nunami maani nunani allaniluunniit ilinniarfinni allani ingerlanneqarsinnaassanersoq, aamma ilinniarneq ilinniarnermullu atatillugu sungiusaatigalugu sulisarneq ataqatigiilluinnassappata.
Kommunit qinnuvigineqarput nassuiaatip tusarniaassutigineqarneranut akissutiminnik 2004-mi februaarip tallimaat tikitsinnagu anngusseqqullugit, ataatsimoorluta akissuteqaaterput 2004-mi febuaarip qulingiluaani KANUKOKA-p Namminersornerullutik Oqartussanut apuussinnaaniassammagu.
Kommunit akissutiminni erseqqissassavaat, qulaani allaqqasut KANUKOKA-p oqaaseqaatai isumaqatiginerlugit. Tamatuma saniatigut soorunami kommunit nassuiaammut isumaat allat tusarusunneqarput.
|
