KANUKOKA-p tusarniaanermut akissutaa

6. februaari 2004

Nassuiaat tusarniaassutigalugu kommuninut nassiussorneqarpoq, tusarniaanerlu kommunit tallimat akissuteqarfigisimalerpaat.

Tusarniaanermut kommunit akissutaanni immikkoortualuit KANUKOKA’p nassiussilluni allakkamini taasimasai takoqquneqarsimapput.

Tusarniaanermut akissutit tiguneqarsimasut aammalu KANUKOKA’p nassuiaammut naliliinera tunngavigalugit isummat makku saqqummiunneqassapput:

* Ilinniartitsisunngorniartarnerup ilusissaatut siunnersuutigineqartup ilinniartitsisunngorniartarnerup inuussutissarsiutissamik bachelor-itut ilinniarninngorlugu allanngortinneqarnissaanik kissaatigineqartoq, aammalu ilinniartitsisunngorniarnerup ilisimasassatigut atitungaatsiartuunissaanik pisariaqartitsineq – tassa nunaqarfinni atuarfiit ilinniartitsissutaasussanik tamanik isumaginnittussanik ikittunnguanik ilinniartitsisoqartut, aammalu illoqarfinni atuarfiit ilinniartitsisut suleqatigiillutik ilinniartitsissutissanik tamanik atuartut ilaannik ataatsimoortunik ilinniartitsiffigisartagaat eqqarsaatigalugit – ajungilluinnartumik ataqatigiississimagai nalunanngilaq.

* Ilinniartitsisussatut sulilluni sungiusartarnerup aammalu taama sulilluni sungiusarnerup, ilinniartitsissutigisassat assigiinngitsut perorsaanermut tunngasumik ilinniartitsissutigisassat imminnut ataqatigiissinneqarnerat ajunngilluinnarpoq. Sulilluni sungiusarnermi atuartut namminersorluni ilinniartinneqartarnissaat pingaartuuvoq.

* Immikkoortumi Perorsaanermut tunngasutigut immikkut pikkoriffigisaqalernissaq (qupp. 16) ilinniartitsisunngorniat ilinniarlutik naammassigunik sapinngisamik atituumik ilinniarsimasuunissaat eqqarsaatigalugu atituumik ilinniartitaanissaq inassutigineqarpoq. Tassa imaappoq klasseni ataasiakkaaniinnaq pinnatik atuartulli atuartuunerat tamakkerlugu ilinniartitsisinnaanngorlugit ilinniartitaasimanissaat. Tassami ilinniartitsisunngorniat bachelor-inngorniarlutik misilitsinnissaminni suliassamik ilinniagassatigut perorsaanermullu tunngasutigut qanoq imaqarnera apeqqutaatillugu atuartunik aalajangersimasumik ukioqqortussusilinnik sammisaqarnissaminnut periarfissaqartussaapput.

* Immikkoortumi Inuttut ineriartornerup tungaatigut qalliullugu immikkut ittumik pikkoriffigisaqalernissaq (qupp. 16 – 17) immikkut pikkoriffigilersinnaasatut ersersinniarneqarsimasoq, soorlu assersuutigalugu tarnip pissusiinut tunngasutigut PD-tut ilinniaqqissutigisassatuunerusoq paasineqarpoq. Taanna ilinniartitsisunngorniarluni ilinniarnermut ilanngunneqassagaluaruni ima initutigissaaq allaat immikkut pikkoriffigisatut ilinniagassamik allamik ingiaasariaqassalluni.

* Alloriaatitut ilinniartitaaneq ilinniartitsissutissatigut atikitsumik tunuliaqutaqarluni ilinniartitsisunngorniartalernissamut periarfissiisorinarpoq. Nassuiaammi taamaallaat perorsaanikkut atitussusissaq sammineqarpoq. Taamaassappat ilinniartitsisut allarluinnaat pissarsiarineqartassapput. Ilinniartitsissutissatigut atituumik tunuliaqutaqarnissaq qanoq qulakkeerneqarsinnaanersoq isumaliutigisariaqarpoq. Aamma ilinniarnermut isernissaq immikkut nalilersortariaqarpoq bachelor-itut ilinniarneq sunaagaluartorluunniit alloriaatitut ilinnialernissamut imaaliallaannaq isissutigineqarsinnaajunnaarlugu.

* Ilinniartitsisunngorniarluni ilinniarnerup ilaata qanoq annertutigisup nunami maani nunaniluunniit allani ilinniarfinni allani ingerlanneqarsinnaanissaa arlaatigut killilerneqar-tariaqarpoq, tassa atuartitsisut ”meeqqat atuarfianni ilinniartitsisutut ilinniarneq naammassisimasariaqaraat” pillugu meeqqat atuarfianni aalajangersakkamut naleqqiunneqassappat, aammalu ilinniarnerup iluunngarmi taavalu meeqqat atuarfianni periaasiusut imminnut ataqatigiilluassappata.

* Ilinniartitsisunngorniartarnerup meeqqat atuarfianni ilinniartitsisutut atorfininnissamik siunnerfeqartuaannarnissaa pingaartuuvoq. Taamaattumik ilinniartitsiunngorniat perorsaanikkut avatangiiseqarnissaat qulakkeerneqartariaqarpoq, meeqqat atuarfiannik soqutigisaqaqatigiiffeqarsinnaanngorlugit, soqutigisaqaqatigiiffeqarnerup Ilinniarfissuup ilisarnaatigisaata nalinganik.

* Ilinniartitsisunngorniarnerup ilinniartitsissutissatigut perorsaanikkullu qaffasissuunissaa qulakkeerniarlugu ilinnialernissamut piumasaqaataasut sukannernerulersinneqarnissaat akuersaarnartinneqarpoq. Taamaattumik ingerlaqqilluni ilinniarnernut iserniartut piumasaqaataasunut anngussinnaanngornissamut pikkorissartarnissaasa eqqartorneqartut pilersinneqarnissaat ilungersuuttariaqarpoq ilinniartitsisunngorniarlutik qinnuteqartartut ikilinnginniassammata, suliluunniit pitsaanerussumik, amerliniassammata.