|
10.06.2004
Nalunngisassitut Qaqortumi borgmesterit kommunaldirektørillu 2003-imi ataatsimiinneranni borgmester Herman Berthelsen, Sisimiut Aalborg-imi saqqummersitsinermi DanFish-messe-mik taaneqartumi kommunit peqataasinnaanerannik siunnersuuteqarpoq peqataasarsimanerminnillu saqqummiivoq. Tassani eqqartorpaa annertuumik kommunerisartik qallunaanit nunanit allamiunillu ilisimaneqarlertarmat taamaasilluni takornarianik, inuutissarsiornermut tunngasutigut aammalu kommunimi sulisinnaasunik pissarsiffigisaramikku. Naatsumik oqaatigalugu saqqummersitsinermi kommune ilisaritinneqartarpoq ilisimaneqarlertarlunilu naak aningaasarpassuit atunngikkaluarlugit.
Una tooruk borgmester Hermann Berthelsen-ip saqqummersitsineq pillugu oqalugiaataa atuarumallugu. Maannamut Aalborg-imi DanFish-messe Kattuffimmiit attaveqarfigaarput ataatsimullu takutitsivissaq 78 m2 inniminneqqallugu. Aalborg-imi saqqummersitsineq tulleq pissaaq sisamanngornermiit 13. oktobari arfinningorneq 15. oktobari 2005 ilanngullugu. Kattuffimmiit kommunit soqutiginnissappata siunnersuutigaarput iluatsillugu borgmesterit kommunaldirektørillu ataatsimiinnissaat Aalborgimi ingerlanneqarsinnaasoq paasisassarsiornermik ilaqartillugu. Kisianni soorunami kommunit aatsaat taamatut iliortoqarsinnaaneranik akuersippata soqutiginnillutillu. Naatsorsuutigaarput kommunit takutitsinermut peqataarusuttut saqqummersitsinermi aningaasartuutissaat annertoorujussuunavianngitsut pingaartumik kommunit ataatsimoorlutik saqqummersitsinermut peqataagunik. Taamaattumik kommunit ataasiakkaat maanna Kattuffiup tusarusuppai imatut: 1. Kommune Aalborg-imi saqqummersitsinermi peqaataarusussinnaava? 2. Kommunip saqqummersitsineq iluatsillugu borgmesterit kommunaldirektørillu 2005-imi paasissassarsiornermik ilalerlugu Aalborg-imi ataatsimiinnissaat akuersaarsinnaavaa? Kommunit amerlanerit qulaani apeqqutinut soqutiginnippata taava Kattuffimmiit maannangaaq piareersarneq ingerlatilissagatsigu matumuuna kommunit qinnuigissavagut tusarniaaneq kingusinnerpaamik 15. juuli 2004 akeqqullugu. Tusarniaanermut akissutit fax-imut 31 11 00 imaluunniit Erna Thomsen-imut e-mail erth@kanukoka.gl -imut nassiuteqquneqarput.
|
