|
8. decembari 2004
Pisortaqarfiup allakkamini nr. 002717-imi 18. novembari2004-meersumi Najukkani radioqarfiit tv-qarfiillu il.il. tapiiffigineqartarnissaannik nalunaarutissamut missiliuut 16. decembari 2004-mut piffissaliilluni tusarniaassutigalugu nassiuppaa.
KANUKOKA isumaqarpoq nalunaarutissamut missiliuut nassiunneqartoq tapiissutisinissamut periarfissanik tapiiffigineqarsinnaassagaannilu piumasarineqartunik naammaginartumik ersersitsisoq. KANUKOKA’lli najukkani radioqarfinnut tv-qarfinnullu nukingertitsinissarujussaq assut nalorninartoqartippaa. Najukkani radioqarfiit tv-qarfiillu 1. januar 2005-imiit tapiiffigineqarsinnaasussaapput radio tv-lu pillugit peqqussut nutaaq naapertorlugu aallakaatitsinissamut akuersissummik ulloq taanna nallertinnagu pissarsisimagunik. Aallakaatitsinissamut akuersissutit pillugit nalunaarut massakkut suli naammassineqanngilaq taassuma tusarniaassutigineqarneranut akissuteqarnissaq aatsaat 9. decembari naasussaammat. Nalunaarutissamut missiliuut matumani pineqartoq pillugu tusarniaanermut akissuteqarfissaq 16. decembarimut killeqarpoq, taamaattumillu naammassinissaanut piffissangaatsiaq ingerlagallartussaalluni. Tassa imaappoq nalunaarutit aallakaatitsinissamut akuersissutinut tapiissuteqarnissamullu tunngaviusussat aaqqissuussineq atuutilersinnagu najukkani radioqarfinnut tv-qarfinnullu, tassalu najukkani radioqarfiit tv-qarfiillu aallakaatitsinissamut akuersissummik pissarsereersimasariaqarfissaannut, paasissutissanillu piumasarineqartunik imalimmik tapiissutisinissamik qinnuteqareersimafissaannut anngussinnaanavianngillat. Tamanna tunngavigalugu KANUKOKA isumaqarpoq 2005-imi kvartali siulleq ikaarsaariarfiusumik aaqqiiffigisariaqavissoq. Tamanna tassaasinnaavoq najukkami radioqarfiup tv-qarfiullu aallakaatitsinissamut akuersissut aaqqitassallu allat 5. april nallertinnagu aaqqereersimappagit taava kvartalimut siullermut tapiissutissat kingumoortumik tunniunneqarsinnaassasut. KANUKOKA’p aamma kajumissaarutigerusuppaa najukkani radioqarfinnut tv-qarfinnullu naatsumik paasiuminartumillu paasissutissiortoqassasoq, tassuuna ersersillugu aallakaatitsisarfik aallakaatitsinissamut akuersissummik tapiissutinillu pissarsissaguni qanorpiaq iliortariaqartoq. Eqqaamassavarput radioqarfiit tv-qarfiillu ilarpaalui allaffeqarfiveqanngimmata, suliassallu tamarmik namminneq piumassutsiminnik sulisuusunit killilimmik piffissalinnit assigiinngisitaaqisunillu pisinnaaffeqartunit isumagineqartarlutik. Pingaartumik aallakaatitsisarfinnut STTK-mut ilaasortaanngitsunut, taamalu tassanngaanniit siunnersorneqarneq ajortunut ajornakusoortussaavoq. Taamaammat aamma inassutigissavarput paasissutissat, immersugassat il.il. aamma kommunit kulturikkut atuartitsinikkullu ingerlatsisoqarfiinut nassiussorneqassasut, taakku peqatigiiffinnut il.il. siunnersuisarnerminnut ilanngullugu najukkani aallakaatitsisarfiit pisariaqartitsisut ikiortarsinnaaniassammatigik. § 5, imm. 1-mi najukkani aallakaatitsisarfinnut nutaanut marlunnut, ingerlatsinermut tapiissutisisinnaassagaanni piumasarineqartunik ukiup ingerlanerani naammassinnikkumaarsinnaasunut, tunngaviusumik tapiissutissat ”attornaveersaaneqartussaapput”. Tamanna qularnanngilaq ajunngilluinnaraluarpoq, kisianni sillimmatitut uninngatitat taakku tamakkiisumik atorneqanngitsoorsinnaanerat ilimanaatilerujussuuvoq. Aallakaatitsisarfinnik nutaanik marlunnik ingerlatsinermut tapiissutinik ukiup ingerlanerani pissarsisoqanngitsoorpat, imaluunniit aallakaatitsisarfiit nutaat ukiup ilaannaanut tapiissutisippata, taava aningaasat ilaat atorneqanngitsuussapput. Taava aningaasat taakku ukiut kvartaliisa sisamaannut tapiissutissanik agguaassinermi aallakaatitsisarfinnut tapiissutisisinnaatitaasunut agguaanneqarsinnaagaluarput. § 8, imm. 2-mi, aamma § 16, imm. 2-mi, taaneqarpoq ”aallakaatitsinissamut akuersissut inatsisartut peqqussutaanni kapitali 5-imi maleruaqqusat malillugit…” Inatsisartut peqqussutissaata aaqqissuunneqarnera nalunaarutissamut missiliuutip tusaarniaassutigineqarnerata kingorna allanngortinneqarsimassanngippat, taava kapitalit 5-iat pinnagu kapitalit 3-at pineqarsimassagunarpoq. § 19-imi allassimavoq ”Aningaasat atorneqanngitsut Radio- aamma tv pillugit aalajangiisartut nuussinnaavaat ….” Taanna allanngortittariaqarpoq imaalillugu: ”Aningaasat atorneqanngitsut Radio- aamma tv pillugit aalajangiisartut nuuttassavaat…..”. § 21, imm. 1, nr. 2-mi, aamma § 21, imm. 2-mi, ”aallakaatitsisarfiit” qularnanngitsumik imaalisariaqarpoq ”aallakaatitsisarfiit STTK-mi ilaasortaasut” imaluunnit ”aallakaatitsisarfiit ilaasortaasut” , tassami STTK taamaallaat ilaasortaminit paasissutissanik pissarsisarmat. |
