|
Tusarniaaneq 29. februaari 2004-mut killiligaavoq, taamaattumillu oqaaseqaataasinnaasut kattuffiup tigoreersimasariaqarpai kingusinnerpaamik ataasinngorneq 23. februaari 2004. Tusarniaanermut piffissaliussap sivikinnera kattuffiup ajuusaarutigaa. Tusarniaanerup allakkiartai quppernerup matuma ataani aaneqarsinnaapput. Qarasaasiatigut ilisarnaatit assammik atsiorluni ilisarnaatinut taartaassapput, allaatitulli pisariitsiginngillat. Allagartaq qarasaasiatigut ilisarnaammik atsiorsinnaassagaanni systemit pisariusut tunngaviusussaapput piareersaanermut, nassiussinermut, tigusinermut aammalu nalunaarutinut paasiuminaallisakkanut ilisarnaasersukkanullu uppernarsaanermut. Nammineerluni atsiorneq nalunaarummut uppernarsaatitut nalinginnaasumik atorneqartarpoq. Allakkat atsiorneqartarput, bilagit atsiorneqartarput, isumaqatigiissutit atsioqatigiissutigineqartarput il.il. Atsiortoq nalunaarutip imarisaa naapertorlugu imminut pisussaaffilertarpoq. Inatsisini assigiinngitsorpassuartigut erseqqissumik piumasaqaatigineqartarpoq allakkatigoortumik atsiornilimmillu uppernarsaateqartarnissaq. Qaqutigoortuunngilaq nalunaarutit uppernassusiat erseqqissarniarlugu pappiaranut immikkut naqitanut allanneqartarnerat. Pappiara allannguutinik takussutissaqanngikkaangat naatsorsuutigineqartarpoq nalunaarut allanngortitaanngitsoq. Qarasaasiatigut attaveqaqatigiilernermi pisariaqalerpoq nalunaarutit uppernassusiat qulakkeerniarlugu isumannaallisaanissaq. Qarasaasiatigut ilisarnaasiineq - elektronisk signatur - tassaavoq kia nalunaarummik suliaqarsimaneranik uppernarsaasiineq. Qarasaasiatigut ilisarnaasiinerup qanoq isumannaatsigineranut ilaatigut apeqqutaassaaq ilisarnaasiinermi teknikkikkut periaatsit suut atorneqarnersut. Pisortaqarfiit ukiuni makkunani ammaassiartorput innuttaasunik suliffeqarfinnillu internetikkut nittartakkat, EDI e-postilu atorlugit attaveqaqatiginninnermut. Taamalu allakkatigoortumik atsiornilimmillu attaveqaqatigiinnissaq inatsisitigoortumik piumasarineqartillugu pisariaqarpoq qarasaasiatigut ilisarnaatip pappiaramut atsiornertulli isumannaatsigisinnaanissaa. Qarasaasiatigoortumik attaveqaqatigiinnermi aamma pisariaqarpoq allakkat isertuussat isumannaatsumik pineqarsinnaanissaat. Nalunaarutinik paasiuminaallisaanikkut qulakkeerneqarsinnaavoq nalunaarutip susassaqartuinnarnit atuarneqarnissaa. Nalunaarutip imaa kodelersorlugu paasiuminaallisinneqartarpoq nalinginnaliuutitut isikkoqalersillugu. Taamaaliornerli najoqqutaqarluni ingerlanneqartarpoq nalunaarutip imaa kingorna iluarsineqarsinnaaqqullugu. Danmarkimi inatsisip Kalaallit Nunaanni atortuulersinneqarneratigut innuttaasunik sullissilluarnerunissamut tunngavissiisoqassaaq aammalu tunngavissiat nunani tamalaani atuuttut qasaraasiatigullu ilisarnaasiisarnermi akisussaanermut maleruagassiat innuttaasunik sullissinermi maannangaaq atorneqarsinnaalissallutik. Taamaattumik kommuneqarfiit kattuffiata kaammattuutigiinnassavaa inatsisit aamma Kalaallit Nunaannut atortuulersinneqarnissaat. |
