Kommuninut ukununnga: Maniitsoq, Sisimiut, Kangaatsiaq, Aasiaat, Qasigiannguit, Ilulissat, Qeqertarsuaq, Uummannaq Upernavillu.

Matumuuna kommunit qulaani pineqartut Kattuffimmiit qilalugartassiissutit agguataarnissaasa Aalisarnermut Piniarnermullu Pisortaqarfiup tusarniutaa ingerlateqqinneqarpoq. Kattuffiup tusarniut aatsaat ippassaq juunip 17-ini 2004 tigusimavaa taamaattumillu tusarniaaffik piffissaq sivikikkaluaq neriuutigaara kommunit kingusinnerpaamik tallimanngorneq 25. juuni 2004 e-mailimut svmo@kanukoka.gl imaluunniit fax nr. 31 11 00 att. Svend Møller akissutaajumaartussat nassiunneqassasut.

Tusarniaanermi Namminersornerullutik Oqartussanit allakkiat quppernerup matuma ataani aaneqarsinnaapput.

Kattuffiup ilisimavaa Namminersornerullutik Oqartussat sineriammut angalaartitaqarlutik qilalukkat pillugit ukiut marluk matuma siorna tusarniaasarsimasut. Taamaattumik Kattuffiup kommunit kaammattussavai piujuannaartitsinissamik siunertaq tunngavigalugit pisassiissutigineqartut aammalu agguataarnissaanut Aalisarnermik Piniarnermillu Pisortaqarfiup tunngavilersuutai nalilersorluarumaaraat.

Ataani atsiortunga juunip 23-ianiit 2004 feeriartussaanera tungavigalugu Kattuffimmi siunnersorti Svend Møller akissutigiumaagassassinnut nassinneqartassaaq.

Kommunit siunnersuutaat tunngavigalugit Aalisarnermut Piniarnermullu Pisortaqarfik tusarniaanerup inerneranik juunip 28-ini 2004 akissuteqarfigineqarumaarpoq.