|
Una tooruk KANUKOKA-p tusarniaanermut akissutaa atuarumallugu 8. februaari 2004
Kultureqarneq, Ilinniartitaaneq, Ilisimatusarneq Ilageeqarnerlu pillugit Pisortaqarfiup allakkiamigut nr. 000176-ikkut 4. februaari 2004-meersukkut radioqarneq TV-qarnerlu pillugit inatsisartut peqqussutissaannut siunnersuut tusarniaassutigaa, tusarniaasitsinermut akissuteqarfissaq 25. februaari 2004-mut killilerlugu
Tusarniaasitsinermut akissuteqarfissaq sivikitsuinnaavoq, asulumi aamma tusarniaasitsinermut atortussat qallunaatuinnaq tiguneqarsimallutik. Taakku quppernerup matuma ataani aaneqarsinnaapput. Tusarniaasitsinermut atortussat allaffitsigoortumik misissugassaqqinnerupput taamaattumillu qallunaatuinnaq nassiunneqarlutik. Atortussat taakku neriorsuutigineqartutut kalaallisuunngortillugit qanittukkut tiguneqassappata malinnaasillugit nassiunneqarumaarput. Radioqarneq TV-qarnerlu pillugit inatsisartut peqqussutissaannut siunnersuutip taarsissavaa Radioqarneq TV-qarnerlu pillugit inatsisartut peqqussutaat nr. 3 17. maaji 1990-imeersoq. Peqqussutissatut siunnersuutigineqartoq ukiuni kingullerni teknik-ikkut ineriartorsimanermut naleqqussaaneruvoq aammalu teknikkikkut akuersissutaateqarnerup tungaatigut ineriartornissamut periarfissanik imaqartinniarsarisaalluni. Peqqussutissatut siunnersuut tunngaviatigut isigalugu isumatuujusorinarpoq aammalu piareersaalluni suliamut 1998-imi tusagassiuutit pillugit isumasioqatigiinnerup kingorna ingerlanneqarsimasumut naapertuussorinarluni. Peqqussutissatut siunnersuut aammalu siornatigut inatsisiliaasimasunut naleqqiullugu allannguutit oqaaseqaatini tassunga atasuni peqqissaartumik sammineqarsimapput. Kommuninut malugeqquneqassaaq peqqussutissatut siunnersuut naapertorlugu najukkani radioqarfiit tv-qarfiillu aallakaatitsinissamut akuersissummik qinnuteqarnerini tusarniarneqartarunnaartussaammata. Tamatumani malugisariaqarpoq najukkani radioqarfiit tv-qarfiillu suulluunniit peqqussutissatut siunnersuummi § 14, imm. 1-mi piumasarineqartut naammassisimagunikkik aallakaatitsinissamut akuersissummik inatsisit naapertorlugit pisinnaasussaammata, tamannalu radiomut tv-mullu tunngasunik akuersisartussat nutaat, aallakaatitsinissamut akuersissutinik tunniussisartussat qulakkiigassarissavaat. KANUKOKA’p peqqussutissatut siunnersuummi aalajangersagaq ataasiinnavik nalorninartoqartippaa. Tassa KNR’ip piseqqusaarutinik ingerlatsisinnaatitaajuarnissaa, allaallu taamaattunik sivisunerusumik aallakaatitsisarnissamut periarfissaqalersussaanera. KANUKOKA isumaqarpoq radiokkut tv-kkullu nuna tamakkerlugu aallakaatitsisarfik pisortanit aningaasalersugaasoq piseqqusaarutinik ingerlatsisinnaasariaqanngitsoq. Piseqqusaarutinik ingerlatsisinnaaneq najukkani radioqarfinnut tv-qarfinnullu taamaallaat pisinnaatitsissutaasariaqarpoq, taakku assigiinngitsutigut isertitarisinnaasaat ingerlaannarsinnaanissaannut apeqqutaasarmata. Radiokkut tv-kkullu piseqqusaaruteqarsinnaaneq tamaat najukkani radioqarfinnut tv-qarfinnullu tunniunneqarpat taava taakku isertitarisinnaasaat amerlissapput taamalu radiokkut tv-kkullu aallakaatitassianik sanaartornissamut tunngavissarissaarnerulerlutik. KNR’ip piffissaq piseqqusaarutinut atortagaa annertusineqassagaluarpat aviisit naqitat piseqqusaarutitigut isertaqarniarnissamut periarfissaat suli annikinnerulissapput. Tusarniaasitsinermut akissuteqarfissap sivikinnera pissutigalugu kommunit qinnuigineqarput tusarniaanermut akissutissat kingusinnerpaamik marlunngornermi 24. februaari 2004 nassiuteqqullugit, taava KANUKOKA tusarniaasitsinermut ataatsimoortumik 25. februaari 2004 akissuteqarsinnaassammat. |
