KANUKOKA-p tusarniaanermut akissutaa

Nuuk, 24. februaari 2004

Pineqartoq: Radiukkut fjernsynikkullu aallakaatitsisarneq pillugu Inatsisartut peqqussutissaannut siunnersuut pillugu tusarniaaneq.

Pisortaqarfiup allagaq nr. 000176, 4. februaari 2004-meersukkut Radiukkut fjernsynikkullu aallakaatitsisarneq pillugu Inatsisartut peqqussutissaannut siunnersuut tusarniaassutigalugu nassiuppaat, akissuteqarnissaq kingusinnerpaamik 25. februaari 2004-mut piffissalerlugu.

./. Atortussat kommuninut tusarniaanermi nassiunneqarsimapput, akissuteqarnissamulli piffissaliunneqartup sivikinera atortussallu qallunaatuinnaq oqaasertaqarnerat pissutigigunarlugu tusarniaanermut akissutit kommuninit arfiniliinnarnit apuussimapput. Tusarniaanermut akissutit ilisimatitsissutitut ilanngunneqarput. Tusarniaanermi atortussat nassiunneqarneranni allagaq KANUKOKA-p malinnaatitaa tusarniaanermut akissutit ilaanni innersuussutigineqartarpoq, taamaattumillu allakkap taassuma assilinera aamma ilanngunneqarpoq.

Tusarniaanermut akissutit tiguneqartut KANUKOKA-llu nammineq tusarniaanermi atortussanik naliliinera tunngavigalugit peqqussutissamut siunnersuummut oqaaseqaatitalimmut oqaatiginiakkat imaattut saqqummiunneqassapput:

Peqqussummut siunnersuut tunngavimmigut ajunngilaq piareersaataasumillu sulianut, 1998-ip upernaavani tusagassiuutit pillugit ataatsimeersuarnerup kingornagut suliarineqarsimasunut, naapertuulluni.

KANUKOKA-lli KNR-ip pilerisaaruserinermik ingerlatsinissamut - allaat piffissamik sivitsuinissamut periarfissaqartumik - periarfissaqaannarnissaa ajornartorsiutitaqartutut isumaqarfigaa. Tunngaviusumik KANUKOKA isumaqarpoq nuna tamakkerlugu pisortanit aningaasalersugaasumik radio- aamma tv-mik aallakaatitsivik pilerisaaruserinermik ingerlatsiviussanngitsoq.

Pilerisaaruserineq sumiiffinni radio aamma tv-mik aallakaatitsivinnut, aningaasaqarniarnikkut assigiinngitsutigut pissarsiaqarsinnaanerit annertuumik aalajangiisuuffigineqartunut, taamaallaat ingerlatassaatitaasariaqarpoq. Radiukkut tv-kkullu pilerisaarinerit tamarmik sumiiffinni radio- aamma tv-mik aallakaatitsivinnut nuunneqarpata, taakku aningaasarsiorsinnaanerat annertuumik qaffassagaluarpoq tamatumuunalu radiukkut tv-kkullu aallakaatitassiornissaminnut periarfissarissaarnerulissagaluarlutik.

KNR-ip pilerisaarinermut piffissamik atuinera annertusitinneqassagaluarpat, naqitanik tusagassiorfiit pilerisaarutitigut isertitaqarniartarnerat suli annertunerusumik tatisimaneqalertussaassaaq.

Naleqquttuusinnaavorli niernermi pilerisaarutaanngitsut, assersuutigalugu pisortatigoortumik ilinniarnerit pillugit pilerisaarutit assigisaallu, KNR-ikkut saqqummiunneqarsinnaajuarnissaat, tamatumuuna nuna tamakkerlugu siammarnissaat qulakkeerniarlugu.

Aammalu eqqarsarnartoqartinneqarpoq sumiiffinni radio- aamma tv-mik aallakaatitsiviit, peqqussummut siunnersuummi § 21-mi KNR-imut atuuttup assinganik, piumasaqarfigineqannginnerat.