|
15.06.2004
Pujortagassat aamma pujortarfiunngitsunik pilersitsinissaq pillugit inatsisartut peqqussutissaattut siunnersuut Pisortaqarfiup tusarniaassutigalugu nassiuppaa, tusarniaanermut akissuteqarnissaq tallimanngornermut juunip 18-iannut 2004 killilerlugu.
Siunnersuut qulaani taaneqartoq KANUKOKA’p kommuninut tamanut tusarniaassutigalugu nassiussorpaa.
Kommunit arfineq marluk tusarniaassummut akissuteqarput.
Ataatsimut isigalugu:
Innuttaasut atuisullu pisortani oqartussaasunut attaveqartariaqartarnerminni kissaatiginngisaminnik pu-joorfigineqartussaajunnaarlugit pisortat illuutaanni pujortarfiunngitsunik pilersitsinissamik isummat tun- ngaviusut KANUKOKA’p isumaqatigai.
KANUKOKA’li isumaqarpoq pisortat illuutaat inersimasut angerlarsimaffiisut atorneqartut, soorlu assersuutigalugit utoqqaat illui, pujortarfiunngitsunik pilersitsinissaq piumasaqaataalissagaluarpat ilanngunneqartariaqanngitsut, tamannalu peqqussummi erseqqissumik takuneqarsinnaasariaqartoq.
KANUKOKA isumaqarportaaq pisortat illuutaasa ilaanni aalajangersimasuni ininik pujortartarfinnik pilersitsinissamik piumasaqaateqarluni peqqussummi aalajangersagaq tulluanngitsoq. KANUKOKA isumaqarpoq suliffiit ataasiakkaat ininik pujortartarfinnik sulisuminnut pilersitsissanerlutik namminneq aalajangertariaqaraat.
Ininik pujortartarfinnik pilersitsinissaq pisussaaffinngortinneqassappat tamanna kommunip pilersitsinermut aningaasartuutigisussaavaa, aamma sumiiffiit ilaanni illuutigineqareersut ilaanni, soorlu assersuutigalugu nunaqarfiit ilaanni kommunit allaffiisa immikkoortoqarfiini aalajangersimasuni, taamaaliornissaq ajornartussaavoq.
Aalajangersakkanut ataasiakkaanut:
§ 3
Illuutit innuttaasunut inersimasunut angerlarsimaffittut atorneqartut peqqussutip pujortarfiunngitsunik pilersitsinissamik aalajangersagartaani ilanngullugit eqqarsaatigineqanngimmata erseqqissumik takuneqarsinnaasariaqarpoq. Tamatumani assersuutigalugit utoqqaat illui aamma innarluutilinnik ulloq unnuarlu paaqqinnittarfiit eqqarsaatigineqarput.
§ 3, imm. 2
KANUKOKA isumaqarpoq sulisut pujortartarfissaannik pilersitsisoqassanersoq suliffiit ataasiakkaat namminneq aalajangigassarisariaqaraat. Peqqussutissatut siunnersuut naapertorlugu pisortani sulisuusut amerlanersaasa (taamaattorli meeqqat atuarfiini, meeqqanik inuusuttunillu ulluunerani aamma ulloq unnuarlu paaqqinnittarfinni sulisut pinnatik) ininik pujortartarfinnik pilersitsisoqarnissaa inatsisitigut piumasaqaatigisinnaassavaat. Taama inatsisinik tunngavilimmik piumasaqaat unioqqutinneqarpat tamanna siunnersuutip § 14-ia naapertorlugu akiliisitsinermik kinguneqartussaavoq. Tamatuma kingunerissavaa ininik sulisut pujortartarfissaannik pilersitsisoqanngippat kommunip akiliisussaanngortitaasinnaanera.
Aammalumi pisortat suliffiutaanni ininik pujortartarfinnik pilersitsinissaq inatsisitigut piumasarineqalerpat tamanna kommunimut aningaasartuutaassaaq.
§ 14
Peqqussutip eqquutitinneqarnissaa qanoq aamma pisortani immikkoortortamit sorlermit nakkutigineqassanersoq erseqqissumik taaneqarsimanngilaq.
| 
