Kultureqarnermut, ilinniartitaanermut, ilisimatusarnermut ilageeqqarnermullu Pisortaqarfiup nalunaarutissamut siunnersuut qulaani taaneqartoq tusarniaassutigalugu nassiuppaa tusarniaanermut akissuteqarfissaq juulip qulingiluaannut killilerlugu.
Taamaattumik kommunit tusarniaanermut akissutaat KANUKOKA’mi kingusinnerpaamik pingasunngornermi juulip arfineq aappaanni tiguneqareersimassapput.
Nalunaarutisssamut siunnersuut nassiussuunneqartoq KANUKOKA’p misissuataareerpaa isumaliutersuutillu makku tunngavigalugit tusarniaanermut akissuteqalersaarluni.
Ataatsimut isigalugu:
Naatsorsuinermut tunngaviusup allanngortinnissaa :
Nalunaarutissamut siunnersuut nassiussorneqartoq kommunit aningaasartuuteqarnerulernerannik kinguneqartussaavoq, tassa katissimanatik inooqatigiissut eqarsaatigalugit akiliutissat aalajangernissaasa naatsorsorsornerannut tunngaviusoq misinnartumik allanngortinneqartussaammat.
Tamakku massakkut iluarsiissuteqarfigineqartarneranni tunngavigineqartoq (Nalunaarut nr. 28. 1989-imeersoq) katissimanatik aalajangersumik inooqatigiissut katissimallutik aappariinnut naligitinneqartarput, taamalu taakku kattullutik isertitaat akileraaruteqaataasussat inooqatigiinneq ukioq ataaseq sinnerluguluunniit sivisussuseqaraangat akiliutissap aalajangernissaani tunngavigineqartarlutik.
Nalunaarutissamut siunnersuut nassiussorneqartoq naapertorlugu akiliisussaatitaasup imaluunniit akiliisussaatitaasut isertitaat akileraaruteqaataasussat tunngavigalugit akiliutissap angissusia aalajangerneqartassaaq. Akiliisartussaatitaaneq siunnersuut nassiussorneqartoq naapertorlugu angajoqqaaniittussaavoq. Angajoqqaat tamarmik immikkut najugaqarpata akiliisussaatitaaneq angajoqqaat arlaanni meeqqap najugaqarfigisaaniittussaavoq. Taamaattussaavoq angajoqqaaq taanna allamik aalajangersumik inooqateqalersimagaluarpalluunnit.
Allannguut tamanna kommuninut aningaasartuutaanerulersussaavoq, tamannalu ataatsimoortumik tapiissutitigut taarsiissuteqarfigineqarani akuerineqarsinnaanngilaq.
KANUKOKA’p aamma taarusuppaa nunatsinni inatsisini aallaaviusarmat katissimanatik inooqatigiissut allatigut arlalitsigut, soorlu pisortanit ikiorneqarnikkut, ineqarnermut tapiissutitigut, soraarnerussutitiatigut il.il. naatsorsuinermi katissimallutik aappariittut pineqartarmata. KANUKOKA isumaqanngilaq aallaaviusartoq taanna meeqqat kommunit ulluunerani paarsisitaanniinnerannut akiliutit tungaatigut sanioqqutissallugu pingaavissumik tunngavissaqanngitsoq.
Meeqqap najugaqarfianut atasumik akiliisussaatitaaneq aamma meeqqap nammineq aaqqitamik ilaqutariinnut paaritinneranut akiliisussaatitaaneq :
Meeraq nammineq aaqqitamik ilaqutariinni paarineqartillugu akiliisussaatitaaneq siunnersuut nassiussuunneqartoq naapertorlugu ilaqutariinni paarsisuusuniittussaatitaavoq. KANUKOKA isumaqarpoq ulluunerani paarsititsinermut akiliisussaatitaaneq angajoqqaatut oqartussaasumiittariaqartoq, tassami nammineq aaqqissuullugu ilaqutariinni paarsititsineq matumani pineqarmat, taamaattumillu akiligassaqarfigeqatigiittoqarsimappat tamanna angajoqqaatut oqartussaasup ilaqutariillu paarsisuusut akunnerminni aaqqittariaqarmassuk.KANUKOKA’p aamma taarusuppaa akiliisussaatitaaneq tamatigut angajoqaatut oqartussaasumiittariaqartoq, taamalu meeqqap sumi najugaqarnera aalajangiisuutittariaqanngitsoq.
Ulloq naallugu ullulluunniit affaani paarsisuusartut:
Siornatigut nalunaarummi aalajangersarneqarpoq meeqqat sap. akunneranut nal. akunneri 25-t tikillugit kommunip ulluunerani paarsisitaaniittartut affaannarmik akiliisitsissutaasassasut.
Nutaamik nalunaarutissamut siunnersuummi nassiunneqartumi tamanna allanngortinneqarpoq, tassa siunnersuutigineqarmat meeqqat sap. akunneranut nal. akunneri 25-t tikillugit kommunip ulluunerani paarsisitaaniittartut affarmik ilivitsumilluunniit akiliisitsissutaasassanersut kommunip siunissami tamanut atuuttumik aalajangersaaffigisinnaalissagaa.
KANUKOKA allannguutissamut tassunga uparuaatissaqanngilaq.
Meeqqat qatanngutigiit akikillisaavigineqartarnerannut ukioqqortusissaritinneqartup allanngortinneqarnera kiisalu tamakkiisumik ilaannakortumilluunniit akeqanngitsumik paarititsisarneq :
Siornatigut nalunaarut naapertorlugu pilersuisuusoq 13-it inorlugit ukiulinnik angerlarsimasunik ataasiinnaanngitsunik kommunip paarsisitaaniittartunik meeraqarsimappat qatanngutigiinnut akikillisaasoqarsinnaasussaavoq. Ukioqqortussusissaatitaq taanna allanngortinneqarpoq, siunissami pilersuisuusoq ataasiinnaanngitsumik angerlarsimasumik 15-it inorlugit ukiulinnik meeraqarsimappat akilillisaassisoqarsinnaalerluni.
Siornagut nalunaarut naapertorlugu meeqqat 0-ip 13-illu akornanni ukiullit akeqanngitsumik inissinneqarsinnaapput ulloq unnuarlu paaqqinnittarfinniitinneqarunik imaluunniit pisortat aqqutigalugit ilaqutariinni paarititaagunik. Ukioqqortussusissaq taanna allanngortinneqarpoq 15-inngorlugu.
KANUKOKA naliliivoq ukioqqortussusissap killingata allanngortinneqarnera tamanna sunniuteqangaartussaanngitsoq, tassami kommunip paaqqinnittarfianiititsinermut ulluuneranilu paarititsinermut akiliut tamatumani pineqarmat.
