|
Aalisarnermut Piniarnermullu Pisortaqarfimmiit tusarniaassutigineqarpoq nalunaarut nutaaq qaammataasat atorlugit aalisariutinik alapernaarsuineq pillugu nalunaarutissamut siunnersuut. Missingiut nalunaarummit atuuttumit allaassuteqarpoq, immikkut akuersissuteqartarnermut nutaanik malittarisassartaqarami. Immikkut akuersissuteqartarnermut malittarisassat atuuttut ikaarsaariarnermi atuussimapput, naleqqukkunnaarmatalu nalunaarummit peerneqarlutik. Taarsiullugu malittarisassamik ilanngussisoqarpoq, Kalaallit Nunaanni iluarsaassisartutut pisinnaatitsissutilimmut piffissap sivikitsup iluani angallammik piginnittup angallammut alapernaarsuinermut atortorissaarut (FOE) ajoqutilik iluarsaatsissinnaanngippagu. FOE ajoquteqartillugu angallatip naalagaanut aallaqqusinnginnermut piumasaqaammit Aalisarnermut Pisortaqarfik immikkut akuersisissuteqarsinnaavoq. Sinerissamut qanittumi aalisarnermi angallatit alapernaarsorneqarnerannut atortorissaarut (ARGOS) atorneqartut piffissap ingerlanerani iluarsaanneqartarnerisa sivisusarnerat allannguummut pissutaavoq. Kalaallit Nunaanni atortorissaarummik taamaattumik iluarsaassisinnaasoq pisinnaatitsissutilillu ataasiinaavoq, taassumallu taartissamaatit pigisai killeqarlutik. |
