|
24.07.2006 Siullermik siusinnerusumisut KANUKOKA-p uparuaatigeqqaassavaa aasaanerani sulinngiffe-qaleruttornerup nalaani tusarniaasarneq pitsaasuunngitsoq, taamaalinerani kommunini qinikkat atorfilittallu amerlanerusut sulinngiffeqarneq pissutigalugu akissuteqarnissaminnut periarfissaqarneq ajormata. KANUKOKA kommuninit tallimanit tusarniaatinut oqaaseqaatinik tigusaqarsimavoq. Kommunit taakku itisilerlugit oqaaseqaataat ilanngullugit nassiunneqarput, taakkunannga oqaaseqaatit ilaat ataani ataatsimut oqaaseqaatinut ilanngunneqarsimallutik. Oqaaseqaatit nalinginnaasut: Annertuumik innarluutillit ikiorserneqartarnerat pillugu Inatsisartut peqqussutaat nr. 7, 3. no-vember 1994-meersoq naapertorlugu tunngaviatigut Namminersornerullutik oqartussat anner-tuumik innarluutillit ikiorserneqarnissaat akisussaaffigaat, tassani apeqqutaanani innarluutillit nammineq inigisaminni, innarluutilinnut ineqarfinni Bokollektiv-ini Boenhed-ini imaluunniit Namminersornerullutik oqartussat ulloq unnuarlu angerlarsimaffiutaanni ineqartuunersut, taa-maattumik Isumaginninnermi Naammagittaalliuuteqaartarfiup Namminersornerullutik oqartussat annertuumik innarluutillit ikiorserneqartarnerannut peqqussut naapertorlugu ikiorsiissutinut akiliisussaatinneqarneranik oqaaseqaasiaa KANUKOKA-p isumaqatigaa. KANUKOKA-mit maluginiarneqarpoq aningaasat atorneqartussat aallaavigalugit peqqus-summut allannguutissamik siunnersuusiortoqarsimasoq, maannakkummi sannaviit illersukkat kisimik tapiiffigineqartartussatut siunnerfigineqarsimammata kommunini ulluunerani sammisassaqartitsiviit pineqaratik. Pisortaqarfiup ilisimariigaatut sinerissami atugarisat, periarfissat neqeroorutillu assigiinngitsorujussuupput, tassanilu pingaarnerunngilaq ulluunerani neqeroorutit tamakku qanoq taaguuteqartinneqarnersut. Tunngaviatigut KANUKOKA-p isumaqataaffiginngilaa innarluutilinnut neqeroorutit qanoq taaguuteqarnerat apeqqutaatillugu tapiisoqartassappat – aallaaviusariaqarpormi annertuumik innarluutillit ikiorserneqartarnerannut peqqussut naapertorlugu ikiorserneqartartut ineriartorfigisinnaasaminnik sammisaqartinnis-saannik neqeroorfigineqarnissaat. Ilaqutariinnermut pisortaqarfiup siunnersuummut nalinginnaasumik nassuiaatimini allassimavaa, Ilaqutariinnermut pisortaqarfiup ukioq 2004 naalersoq innarluutilinnik suliffissaqartitsinermut annertussusileriikkamik akiliutigisartakkanut aningaasaliissuteqartarnini unitsissimallugu, peqqussummi aalajangersakkat ima nassuiaateqartinneqarmata annertuumik innarluutilinnik suliffissaqartitsinissamut peqqussutit periarfissaqartitsinngitsut. Pisortaqarfik nangilluni allappoq Isumaginninnermi Maalaaruteqartarfiup 28. april 2006 aalajangiussamigut kommu-nit taperserai annertuumik innarluutillit ikiorserneqartarnerat pillugu Inatsisartut peqqussu-taat nr. 7, 3. november 1994-meersoq naapertorlugu peqqussutitigut periarfissaqarmat annertuumik innarluutillit suliffissaqartinniarnerannut tapiissuteqartoqarsinnaanera. Isumaginninnermi Maalaaruteqartarfiup 28. april 2006 suliani aalajangiiffigisai tassarpiaapput kommunini sammisassaqartitsiviit/ornittakkat (væresteder), taamaalilluni Ilaqutariinnermut pisortaqarfiup 11.7.2006 siunnersuummini qulequttami Væresteder-nik allassimasoqarnera kukkuneru-nerarlugu aammalu siunnersuut nutaaq naapertorlugu saanaviit illersukkat kisimik tapiiffigineqarsinnaasussaanerarlugit erseqqissaataa kukkunermik tunngaveqarsimassaaq, taamaattoqassappammi Inatsisartut peqqussutaanni § 26 kiisalu Nalunaarummi § 40 akimorlugit iliortoqassammat. KANUKOKA isumaqarportaaq annertuumik innarluutillit ikiorserneqartarnerat pillugu Inatsisartut peqqussutaat tamakkiisumik nutarterneqalerpat ikiorsiisarnissanut innarluutillip sumi ineqartuunera aallaavigineqassanngitsoq, innarluutilinnulli peqqussut malillugu ikiorserneqartartut TAMARMIK assigiimmik ikiorserneqarnissaminnut periarfissaqartinneqassasut, soorluttaaq siusinnerusumi 60-nik maannalu 63-nik ukioqaleraangamik annertuumik innarluutilinnut peqqussut malillugu ikiorserneqarsinnaajunnaartarnerannik killiliussaq atorunnaarsinneqassasoq. Soorlu Ilulissat kommuniata ilaatigut oqaaseqaammini oqaatigigaa sinerissami pingaartumik inuit tarnikkut nappaateqartut amerlasuut ullumikkut neqeroorutit annertunngitsut saniatigut allatut aaqqissuussanik sammisaqartinneqarnissaminnut pisariaqartitsipput. Imaanngilarmi annertuumik innarluutillit taakkuussasut neqeroorutinut naleqqussartussat, akerlianilli sammisassaqartitsinissamut neqeroorutit innarluutillit pisariaqartitaannut naleqqussartariaqarput. Naggataatigut KANUKOKA-p naatsorsuutigaa Isumaginninnermi Maalaaruteqartarfiup 28. april 2006 aalajangiisimanera naapertorlugu innarluutillit ornittagaannut, ulluunerani sammisassaqartitsivinnut assigisaannulluunniit kommunit suli tapiiffigineqarsinnaasut.
|
