Nuuk, 3. juli 2006
Pillugu: Atuarfiit tunngaviliiviit namminersortut, angerlarsimaffinni ilinniartitsinerit il.il. pillugit Inatsisartut inatsisaat nr. 10, 15. april 2003-meersup allanngortinnissaanut siunnersuummik tusarniaaneq
Atuarfiit tunngaviliiviit namminersortut, angerlarsimaffinni ilinniartitsinerit il.il. pillugit Inatsisartut inatsisaat nr. 10, 15. april 2003-meersup allanngortinnissaanut siunnersuutip tusarniaaffiginera Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmit KANUKOKA-p 5. april 2006-imi tiguaa. Ulloq taanna KANUKOKA-p tusarniaatitut atugassiat kommunenut ingerlateqqippai tusarniaanerup 20. april 2006-imut naammassineqarsimanissaanut piffissalerlugu, KANUKOKA-p tusarniaanermut akissutaa 21. april 2006-imi Namminersornerullutik Oqartussanut tunniussimasussaanera pissutigalugu.
Tusarniaanerup naammassineqarsimanissaanut piffissaliussami taamaallaat Sisimiut Kommuneat akissuteqarsimavoq, kingornatigullu Nuup Kommuneanit aamma Uummannap Kommuneanit akissuteqartoqarpoq. Pingaarnerutillugu piffissaliussap sivikitsuinnaanera tusarniaanermut akissutit ikittuinnaanerannut paatsisaannguatsiarpoq.
Siunnersuutip Inatsisartut ukiamut ataatsimiinneranni aappassaaneerlugulu pingajussaaneernera sioqqullugu kommunet tamaasa tusarniaanermut akissuteqarnissaannut periarfissiiniarluni kommuneni nutaamik tusarniaasoqarnissaa Inatsisartut Kultureqarnermut Ilinniartitaanermullu ataatsimiititaliaata kissaatigisimavaa.
Tamatumuuna tusarniaanermut akissuteqarnissamut piffissaliussaq 4. september 2006-iuvoq, naallu sulinngiffeqarfiup nalaaniikkaluarluni kommunet amerlanerujussuit tusarniaanermut akissuteqarnissaminnut periarfissaqassapput. Naallu ingammik kommunet mikinerusut namminersortunik atuarfiliornissamik naatsorsuuteqanngikkaluartut inatsisissatut siunnersuummut isummersuutaat aamma kissaatigineqarpoq.
Taamaattumik upernaami tusarniaanermi akissuteqarnissaminnut kommunet periarfissaqarsimanngitsut tusarniaanermut akissutiminnik KANUKOKA-mut kingusinnerpaamik tallimanngorneq 1. september 2006-imi nassiusseqquneqarput, taamaalilluni 4. september 2006-imi Namminersornerullutik Oqartussanut ataatsimoorussamik tusarniaanermut akissummik KANUKOKA tunniussaqarsinnaaniassammat.
./. Atortussiat makku ilanngunneqarput:
KANUKOKA-p kommunenut allakkiaa 5. april 2006-imeersoq.
KANUKOKA-p allakkiamini 5. april 2006-imeersumi aamma KANUKOKA-p tusarniaanermut akissutimini 20. april 2006-imeersumi isummersuutaanut akuersaarsinnaanertik pillugu tusarniaanermut akissutiminni kommunet oqaaseqaateqarnissaat inussiarnersumik qinnuigineqarput. Soorunalumi tamatuma saniatigut kommunet inatsisissatut siunnersuummut allanik piumassusertik naapertorlugu oqaaseqaateqarsinnaapput.
Inussiarnersumik inuulluaqqusillunga
Karl Nielsen
siunnersorti
