Kommunini suliassaqarfiit aaqqissuuteqqinneqarnissaat pillugu Inatsisartut inatsisaannut siunnersuut pillugu tusarniaaneq.
Kommunini suliassaqarfiit aaqqissuuteqqinneqarnissaat pillugu inatsisartut inatsisissaannut siunnersuut Naalakkersuisut Allattoqarfiannit KANUKOKA-mut 18. maaji 2007-imi annguppoq.
Kommunini tamani siunnersuut KANUKOKA-p tusarniaassutigisimavaa. Kommuninit ukunannga akissuteqartoqarpoq:
Tusarniaanermut akissutit taakku, allakkamut matumunnga tapiliullugit ilanngussat, tunngavigalugit KANUKOKA-miit imaattunik oqaasissaqarpugut:
Aallarniutigalugu kommunini nutaani kommunalbestyrelsit sulineranni pitsaanerpaamik atugassaqarnissaannik isumannaariniarneq pillugu inatsisissatut siunnersuutip anguniagarisaanut Kattuffiup isumaqataanera oqaatigissavarput.
Inatsisissatut siunnersuummi aalajangersakkanut ataasiakkaanut oqaaseriumasat:
§ 3 aamma § 4 Qinersineq.
§ 3 imm. 1 pillugu nassuiaatit naapertorlugit kommunit kattuttut tamarmik immikkut qinersiviusutut taasariaqarput.
Tamatuma kingunerisassaasa ilagaat innuttaasut partiimik aalajangersimasumik qinersisinnaassannginnerat partii taanna kommuniusimasumi qinigassanngortitaqanngippat.
Kommuneqarfiit kattuffiata isumaa malillugu kommunit kattuttutut isigineqarsinnaassappata kommunimi nutaami innuttaasut taasinerminnik atuinissaminnut assigiimmik periarfissaqartariaqarput.
Qinersiviit 18-it atatiinnarneqarnissaannut pissutaatinneqannguatsiarpoq kommuniusimasut tamarmik immikkut ataatsimik qinersivittut ilaasortaaffeqartinneqarnissaat. Kisianni taasinerit kommuniusimasuni ataasiakkaani tamani kisinneqassagaluarpataluunniit tamanna kommunip nutaap qinersivittut ataasiunissaanut akornutaasinnaasariaqanngilaq.
Taamaattumik Kattuffiup siunnersuutigaa Ikaarsaariarnermi ataatsimiititalianut qinersinissami kommunalbestyrelsinut, nunaqarfinni aqutsisunut ilagiillu sinniisaannut qinersisarnermut inatsimmi maanna atuuttumi aalajangersakkat aallaavigineqassasut.
Kommuniusimasoq aalajangersakkat taakku naapertorlugit qinigaatitaqanngitsuussagaluarpat ilaasortaaffissat nunngutaat sumiiffimmi sinniisuutitassamut tunniunneqartariaqarpoq.
§ 8 Nunaqarfinni aqutsisut.
Inatsisissatut siunnersuummi § 6-imi aalajangerneqarpoq piffissaq kommuniusimasuni kommunalbestyrelsit atuuffigisaat 31. decembari 2008 naassasoq, taamaattorli § 8-mi aalajangersarneqarluni piffissaq nunaqarfinni aqutsisut atuuffigisaat 31. decembari 2009-mut sivitsorneqassasoq.
Nunaqarfinnili aqutsisut oqartussaaffii kommuniusimasuni kommunalbestyrelsit suliassiinerinik tunngaveqarput. Taamaattumik nunaqarfinni aqutsisut oqartussaaffii aamma 2008-ip naanerani atorunnaassapput.
Taamaattumik tulluartuunanilu pisortatigoortumik ingerlatsiveqarnermi suliassiissutigineqartartut pillugit inatsisini tunngavigisaasunut nalinginnaasunut naapertuutissanngilaq nunaqarfinni aqutsisut oqartussaaffeerutereeraluarlutik ataannassappata.
Tamanna tunngavigalugu piffissaq nunaqarfinni aqutsisut atuuffigisaat killilerneqartariaqarpoq kommuniusimasut atorunnaarnissaannut, tassa 2008-ip naaneranut. Kommunit arlallit aamma taama isumaqarput, ilaatigut Qasigiannguit, Sisimiut Narsarlu.
Taamaattorli Paamiut Kommuniata aamma Nanortallip Kommuniata kaammattuutigaat nunaqarfinni aqutsisoqarnerup atatiinnarneqarnissaa. KANUKOKA-p aaqqissuussaanermik iluarsaaqqinnissaq pillugu immikkut ataatsimiititaliaata isuma tamanna tapersersorpaa.
§ 9 Ikaarsaariarnermi ataatsimiititaliap inissitsiterluni ataatsimiinnera.
§ 9 imm. 1-imi allassimavoq Ikaarsaariarnermi ataatsimiititaliaq kingusinnerpaamik 1. maaji 2008 inissitsiterluni ataatsimiissasoq.
Ikaarsaariarnermi ataatsimiititalianut qinersinerup 8. apriili pinissaa aammalu Qinigaasinnaanermut ataatsimiititaliap kommunalbestyrelsinut, nunaqarfinni aqutsisunut ilagiillu sinniisaannut qinersisarneq pillugu Inatsisartut inatsisaanni § 53 malillugu sulinissaminut piffissaqarnissaa eqqarsaatigalugit KANUKOKA isumaqarpoq inissitsiterluni ataatsimiinnissamut piffissaliussaq siusippallaartoq.
Kattuffiup kaammattuutigaa piffissaliussaq kinguartinneqassasoq Ikaarsaariarnermi ataatsimiititaliaq kingusinnerpaamik 1. juuni 2008 inissitsiterluni ataatsimiittussanngorlugu.
§ 10 Ataatsimiititaliornerit.
§ 10 imm. 2 pillugu nassuiaatinit paasinarpoq Ikaarsaariarnermut ataatsimiititaliap aalajangerneratigut ataatsimiititaliat pilersinneqartussat kommunimi nutaami kommunalbestyrelsimut atuutissasut.
Imaassinnaavoq piffissami ikaarsaariarfiusumi ataatsimiititaliamik taamaallaat 31. decembari 2008-ip tungaanut atuuttussamik pilersitsinissaq tulluartuussasoq, tulluartuussasorinanngilarli ataatsimiititaliap taamaattup kattunnerup kingorna atuutiinnarnissaa.
Inatsisissamut nassuiaatini erseqqissarneqarsinnaavoq ataatsimiititaliat ataavartut kisimik ingerlaqqikkumaartut.
§ 13 Ikaarsaariarnermi ataatsimiititaliat missingersuusiaat
§ 9-mut tunngatillugu oqaaserisavut innersuussutigalugit kaammattuutigissavarput missingersuusiat saqqummiunneqarnissaannut piffissarititaq qaammammik ataatsimik sivitsorneqassasoq, tassa Ikaarsaariarnermi ataatsimiititaliap siulittaasua kingusinnerpaamik 1. juuli 2008 missingersuusianut siunnersuumik saqqummiussisussanngorlugu.
§ 14 Ikaarsaariarnermi ataatsimiititaliat aningaasaataat.
§ 14 pillugu nassuiaatinit paasinarpoq Ikaarsaariarnermi ataatsimiititaliat tamarmik 2008-mi Namminersornerullutik Oqartussanik 2 mio. kr.-inik tapiissutisinissartik naatsorsuutigisinnaassagaat aammalu Ikaarsaariarnermi Ataatsimiititaliat atuunnerannut aningaasartuutit Namminersornerullutik Oqartussat tapiissutaasa saniatigut kommuninit kattuttussanit akilerneqassasut.
Taamaattorli § 14 imm. 1-imi erserpoq Ikaarsaariarnermi ataatsimiititaliat aningaasartuutissat ilassutissaasa taakkua qanoq kommuninut ataasiakkaanut agguataarneqarnissaat aalajangissagaat.
Tulluartutut isigineqanngilaq Ikaarsaariarnermi ataatsimiititaliat kommunalbestyrelsit atuuttut avaqqullugit aningaasassarsiorsinnaanissaat aammalu immaqa assigiinngisitsinertalimmik aningaasartuutit kommuninut ataasiakkaanut qanoq agguataarneqarnissaannik aalajangiisinnanerat.
Ikaarsaariarnermi ataatsimiititaliat sulinerannut aningaasanik amerlanerusunik pisariaqartitsisoqassappat tamanna Namminersornerullutik Oqartussat aningaasaliiffigisariaqarpaat.
§ 15 Kukkunersiuisussanik toqqaaneq
§ 9 aamma § 13 pillugit oqaaserisavut innersuussutigalugit § 15 taakkununnga naapertuuttumik iluarsisariaqarpoq, tassa kukkunersiuisussanik toqqaanissamut piffissarititaq qaammammik ataatsimik sivitsorlugu kingusinnerpaamik 1. aggusti 2008 pisussanngorlugu.
§ 16 Kommunip aqqa ilisarnaataalu.
Kommunip nutaap kissaatigineqartutut qanoq ateqarnissaa sumillu ilisarnaateqarnissaa Ikaarsaariarnermi ataatsimiititaliap § 16 imm. 2 naapertorlugu aalajangissava. Nassuiaatinili allassimavoq ateq ilisarnaallu Inatsisartut inatsisaatigut aalajangersarneqassasoq.
Taamaalilluni inatsisissatut siunnersuummi tamannalu pillugu nassuiaatini oqaatigineqartut imminnut naapertuutinngillat.
§ 17 Ingerlatsiviit sumi inissisimanissaat allaffissornikkullu aqutsinermi pisortat.
§ 17 imm. 2 naapertorlugu Ikaarsaariarnermi ataatsimiititaliaq allaffissornikkut aqutsinerup ineriartortinneqarnissaanut pisariaqartitsineq naapertorlugu atorfinitsitsissaaq allaffissornikkut aqutsinermi pisortanik.
Ikaarsaariarnermi ataatsimiititaliat allaffissornermut ikaarsaariarnermilu ataatsimiititaliat akissarsiaannut killilimmik aningaasaateqarmata qulakkeerneqartariaqarpoq allaffissornikkut pisortartaat siusinnerpaamik 1. januaari 2009 kommunimi nutaami atorfininnissaat.
Aamma taasariaqarpoq inatsisissatut siunnersuummi § 17 imm. 2-mi titarnertaap aappaani innersuussineq kukkusuugunarmat. Tassani innersuussutigineqarput aqutsinermut inatsimmi §§ 31 aamma 65. Nassuiaatinilu §§ 21 aamma 65 innersuussutigineqarput, taakkulu eqqortuussapput.
§ 17 imm. 3 naapertorlugu sumiiffissanik aammalu allaffissornermi pisortassanik atorfinitsitsinissanik aalajangiinerit kingusinnerpaamik 31. decembari 2008 pissapput.
Sumiiffissanik allaffissornermilu pisortassanik atorfinitsitsinissanik aalajangiinerit missingersuusiornermut sunniuteqartussaapput, kisianni 2009-mut missingersuusiat suliarineqarlutillu akuersissutigineqassapput inatsisissatut siunnersuummi § 18 naapertorlugu, imaappoq inaarutaasumik missingersuusiat kingusinnerpaamik 30. novembari 2008 naammassereersimassallutik.
Taamaalillutik § 17 imm. 3-mi piffissaliussaq aamma missingersuusianik suliarinninnissamut akuersissuteqarnissamullu piffissaliussaq imminnut naapertuutinngillat.
Kattuffiup kaammattuutigissavaa aalajangernissat § 17 imm. 3-mi taaneqartut missingersuusianik akuersissutiginninnissamut atatillugit pissasut.
§ 19 Akileraarusiisarnermik akigititanillu nalimmassaaneq.
§ 19 naapertorlugu 1. januaari 2009-mi akileraarutit akigititallu nalimmassarneqassapput, Naalakkersuisulli immikkut akuersissuteqarnerisigut piumasaq tamanna sanioqqunneqarsinnaassalluni.
Naalakkersuisut taamatut immikkut akuersissuteqarnissamut periarfissaq atussappassuk kommunip nutaap iluani kommuniusimasuni akileraarutit procentii assigiinngitsut atuussinnaassapput.
Akileraartarnermut inatsisip atuuttup taamatut pisoqarnissaa naatsorsuutiginngilaa, taamaattumillu immikkut akuerineqarnikkut sanioqqutsisinnaaneq tamannaannarluunniit pissutigalugu tulluartuusorinanngilaq.
Kattuffiup aamma taasariaqarpaa aaqqissuussaanermik iluarsaaqqinnissap siunertaasa ilagimmassuk kiffartuussinernik assigiissaarinissaq, aamma akileraarutinik akigititanillu nalimmassaanissaq eqqarsaatigalugu.
Naalakkersuisut isumaqarpata 1. januaari 2009-miit akileraarutinik akigititanillu nalimmassaanissaq kommunit sapissagaat, taava immikkut akuersissuteqarnikkut sanioqqutsinissamut periarfissiinissaq pinnagu aaqqissuussaanermik iluarsaqqinnissap § 6 malillugu atuutilerfissaata kinguartinneqarnissaa isumaliutigisariaqarpoq.
§ 20 31. decembari 2008-p tungaanut aningaasartuutit.
§ 20 imm. 1-imi aalajangersarneqarpoq kommunit kattussimasut 1. maaji 2008-p kingornatigut taamaallaat aningaasartuuteqarsinnaasut 2008-mut missingersuutit akuerineqarsimasut ilaannik.
Tamanna aqutsinermut inatsisip § 39-ani aamma § 40-ani tunngaviusuni allassimareerpoq, taamaattumillu aalajangiussaq pisariaqanngilaq peertariaqarlunilu.
§ 20 imm. 3-mi aalajangersarneqarpoq kommunimi kattussimasumi kommunalbestyrelse 1. maaji 2008-p kingorna taamaallaat Ikaarsaariarnermi atatsimiititaliap siumoortumik akuersineratigut ilassutitut aningaasaliissuteqarsinnaasoq, inatsisit malillugit ingerlatsinerpiamullu tunngassuteqanngitsut tamatumani pineqarpata.
Ilassutitut aningaasaliissutaasut tamarmik Ikaarsaariarnermi ataatsimiititaliap akuersissuteqarfigisariaqarai KANUKOKA-p kaammattuutigaa. Tamatuma nassatarisaanik § 20 imm. 2 peertariaqarpoq.
§ 20 imm. 4 naapertorlugu piumasaqaatigineqarpoq atorfiit nutaat pilersinnissaannut Ikaarsaariarnermi ataatsimiititaliaq sioqqutsisumik akuersissuteqassasoq. Atorfinnut pioreersunut atorfinitsitsisoqaqqissinnaanera, tamatumali Ikaarsaariarnermi ataatsimiititaliap isumasioqatigineratigut pisarnissaa, malittarisassamut nassuiaatini allassimavoq.
Taamaattorli kommunimut nutaamut tulluanngitsunik atorfinitsitsinerit pinaveersaarniarlugit atorfinnut pioreersunut atorfinitsitseqqinnerit Ikaarsaariarnermi ataatsimiititaliap akuersissuteqarnissaanik aamma pisariaqartitsisariaqarput.
§ 21 Aningaasaliissutinik akuerisanik atorunnaarsitsineq ikililerinerluunniit
Kommunini kattussimasuni 2008-mut missingersuusiat akuersissutigereersimasat Ikaarsaariarnermi ataatsimiititaliap atorunnaarsissinnaavai imaluunniit ikililersinnaallugit, § 21, imm. 2 inn.
Taamaattorli taasariaqarpoq missingersuusianik atorunnaarsitsineq imaluunniit ikililerineq kommunip isumaqatigiissuteqarnikkut pisussaaffeqalernissaanut pinngitsoortitsisinnaanngimmat. Taamaalilluni ”karsimik imaarsinermik” taaneqartartoq malittarisassiap pinngitsoortissinnaanngilaa, naak tamanna malittarisassiamut siunertaritinneqarsimarpasikkaluartoq.
Taamaattumik malittarisassiaq peertariaqarpoq, ”karsimillu imaarsinerup” pinngitsoortinnissaanut Naalakkersuisut erseqqinnerusumik malittarisassanik aalajangersaanissamik kissaateqassappata piginnaatitsinermut malittarisassiaq § 21 imm. 4-miittoq atortariaqarpoq.
§ 23 Tjenestemandit.
Piumasat manna tikillugu atuuttut assingusut atugarissallugit kommunini nutaani tjenestemanditut atorfillit kommunimut kattuttussamut ilaasuni kommunini atorfeqartut atorfinitsinneqartussaassapput 1. januaari 2009-mi, § 23 inn.
Kommunip kattuttussap kommunalbestyrelsia atorfinitsitsinermut oqartussaassasoq aammalu kommune kattunneqartoq atorfinitsitaaffiussasoq malittarisassap nassatarissagaa nassuiaatini allassimavoq. Tamanna inatsimmi namminermi allassimasariaqarpoq taamaalilluni nassuiaatitigut inatsisiliortoqannginniassammat.
Kattuffik isumaqarportaaq nassuiaatitigut erseqqissassallugu kommunimut nutaamut ikaarsaariarneq aammalu atorfinitsitaaffigisap allanngortinnera nutaamik atorfinitsitaanermut allakkanik imaluunniit atorfinitsitaanermut allakkanut pioreersunut tapiliussaqarnissamik nassataqartariaqanngitsoq. Namminersornerullutik Oqartussani aamma kommunini tjenestemandit pillugit inatsisartut inatsisaat nr. 21, 18. decembari 2003-meersumi § 11 imm. 1 naleqqiulli.
Kattuffiup kaammattuutigissavaattaaq aalajangersaasoqassasoq tjenestemandit aaqqissuussaanermik iluarsaaqqinnerup malitsigisaanik atorfeqarnikkut allannguutinik tjenestemandit pillugit inatsisip akuerisinnaasaanit pisarnermillu annertunerusunik akuerinnissinnaasariaqarnerannik. Tamanna pisariaqarpoq tjenestemandit soraarnerannut atatillugu aningaasartuuterpassuanngorsinnaasut, soorlu atorfilittut pisassarititat (rådighedsløn) soraarnerussutisiassallu, pinaveersaartinneqassappata.
Aarleqqutigisariaqarpoq pingaartumik Avannaani kommunimi nutaami tjenestemandit soraarnerinut aningaasartuutit amerlasoorujussuusinnaanerat, tassa atorfinnik naleqquttunik tamanut pissarsiniarnissaq ajornakusoorsinnaammat, kommuniusimasuni atorfiit assigiiaartut arfineq-pingasut tikissinnaammatigit (kommunaldirektørit arfineq-pingasut, meeqqanut kultureqarnermullu pisortat arfineq-pingasut il.il.).
Aaqqissuussaanermik iluarsaaqqinnerup kingunerisaanik tjenestemandit isumaqatigiissutillu tunngavigalugit atorfinitsitat soraarnerinut aningaasartuutaasinnaasut Namminersornerullutik Oqartussanit akilerneqartariaqarput.
Tamannali aamma aaqqinneqarsinnaavoq tjenestemandit soraarneranni aaqqissuussinermik isumaqatigiissuteqarnikkut, pingaartumik direktøritut ingerlatsivimmilu pisortatut atorfeqartut eqqarsaatigalugit. Aaqqissuussineq taamaattoq Namminersornerullutik Oqartussanit akilerneqartariaqarpoq, tassa aaqqissuussaanermik iluarsaaqqinnissaq Namminersornerullutik Oqartussat suliakkiissutigisimammassuk.
§ 29 Akissarsiat aamma borgmesterit qinigaajunnaarnersiutissaat.
Ikaarsaariarnermut ataatsimiititaliamut ilaasortassatut borgmesterit toqqarneqarsimanngippata, taamaalillutillu kommunip nutaap kommunalbestyrelsiani ingerlaqqissanngippata borgmesterit tunuartut piffissami 1. januaari - 30. apriili 2009-mi akissarsitinneqarnissaat § 29 imm. 1-ip aalajangersaavigaa.
Qinikkat tamarmik soorunami naatsorsuutigisimavaat piffissami qinigaaffigisaminni qinikkatut ataannarsinnaanissartik.
Taamaattumik kommuneqarfiit kattuffiata paasiuminaatsippaa Namminersornerullutik Oqartussat – tunngavilersugaanngitsumik – assigiinngisitsiniarmata borgmesterinik qinikkanillu allanik.
Taamaattumik kommuneqarfiit kattuffiata kaammattuutigissavaa § 29 imm. 1-ip allanngortinneqarnissaa, aalajangersagaq borgmesterinuinnaq atuuttussanngornagu qinikkanulli tamanut kommunalbestyrelsit, nunaqarfinni aqutsisut il. il. pillugit Inatsisartut inatsisaat naapertorlugu akissarsiaqartinneqartunut.
Borgmesterit qinigaajunnaarnersiuteqartarnerat pillugu nalunaarummi nr. 23, 12. septembari 1997-imeersumi piffissap sivisussusissaanik piumasaqaatip sanioqqunneqarsinnaaneranut immikkut akuersissuteqarnermut atasumik Namminersornerullutik Oqartussat aningaasartuutit isumagissagaat § 29 imm. 2-mut atatillugu ilanngunneqartariaqarpoq.
Immikkut taasariaqartitat.
Kommunit arlallit, tassa Nuuk, Paamiut, Ammassalik, Ittoqqortoormiit aamma Qasigiannguit, kaammattuuteqarput kommunalbestyrelsimut ilaasortat § 2-mi 17-iusussatut siunnersuutigineqartut 21-nut amerlineqassasut.
Aaqqissuussaanermik iluarsaaqqinnissap piffissalersugaaneranut tunngatillugu kommunit Sisimiut, Maniitsoq, Qeqertarsuaq aamma Nanortalik aarleqquteqarput. Sisimiut, Qeqertarsuup aamma Nanortallip kaammattuutigilluinnarpaat aaqqissuussaanermik iluarsaaqqinnerup atuutilerfissaata ukiumik ataatsimik kinguartinneqarnissaa.
Aamma kommunit arlallit taavaat aqutsinermut inatsimmi § 65-ip kommunit nutaassat pisariaqartitaannut naleqqussarneqarnissaa, taamaalillutik kommunit nutaat namminneerlutik akissarsiat atorfeqarnermilu atugassarititaasut pillugit isumaqatiginninniarsinnaalerniassammata.
Naggasiutigalugu kattuffiup taasariaqartippaa inatsisissatut siunnersuutip oqaatsimik ”kommunimik kattunneqartumik” atuinera tulluanngimmat, tassa nassuiaatit naapertorlugit pineqarmata kommunit maanna suli kattussimanngitsut.
Inussiarnersumik
Jacob Hinrichsen
