Sumiiffinni sinniisut pillugit aqutsinermut inatsimmi malittarisassanik siunnersuutit pillugit Inatsisartuni aalajangigassatut siunnersuutip tusarniaassutigineqarnera.
18. maaji 2007 KANUKOKA-mi tiguarput Naalakkersuisut Allattoqarfiata tusarniaassutaa, tassa Inatsisartuni aalajangigassatut siunnersuut, naalakkersuisut 2008-mi upernaakkut ataatsimiinnermi saqqummiussaqassasut kommunini aqutsinermut inatsisissamik nutaamik sumiiffinni sinniisut (aamma paasissutissani allani Namminersornerullutik Oqartussaneersuni ”najukkani aqutsisunik” taaneqartut) pillugit malittarisassanik imaqartussamik.
KANUKOKA-p siunnersuut kommuninut tamanut tusarniaassutigaa. Kommunillu uku akissuteqarput:
Tusarniaanermut akissutit taakku allakkamut matumunnga tapiliullugit ilanngussavut tunngavigalugit KANUKOKA-miit ima oqaaseqassaagut:
Aallaqqaasiutigalugu taasariaqarpoq siunnersuutip siunertaa kommuneqarfiit kattuffiata isumaqatigimmagu, tassa illoqarfinni nunaqarfinnilu qanimut oqartussaaqataaneq nukittorsarneqassasoq innuttaasullu najukkaminni ingerlatsinikkut suliassanut amerlanerusunut akuutinneqalissasut. Tamanna pillugu KANUKOKA-p aaqqissuussaanermik iluarsaaqqinnissaq pillugu immikkut ataatsimiititaliaata kaammattuutigisimavaa nunaqarfinni aqutsisoqarnermik aaqqissuussinerup atatiinnarneqarnissaa.
Aamma kattuffiup taasariaqartippaa sumiiffinni sinniisoqarnerup siunertarisariaqarmagu inuit najukkaminni demokratii tunngavigalugu sunniuteqaqataasinnaanerisa suliniuteqaqataasinnaanerisalu annertusarneqarnissaat.
Taamaattumik sumiiffinni sinniisut kommunini allaffissornikkut aaqqissuussinerup ilaatut isigineqassanngillat, kisiannili sumiiffinni sunniuteqaqataasinnaanermik kommunini killeqarfiit maanna atuuttut akimorlugit nukittorsaanertut isigineqassallutik.
Siunnersuummi aalajangersakkat ataasiakkaat pillugit oqaaseqaatit:
Ad. Siunnersuummi immikkoortoq 4.
Siunnersuutip immikkoortuani 4-mi aalajangersarneqarpoq sumiiffinni sinniisunut ilaasortat kommunalbestyrelsinut ilaasortaajutigisinnaassanngitsut.
KANUKOKA-p paasiuminaatsippaa sooq sumiiffinni sinniisoqarnermut tunngatillugu marloqiusamik ilaasortaaffeqarnissaq inerteqqutaassasoq naak marloqiusamik ilaasortaaffeqartarneq tamanut tunngatillugu inerteqqutaatinneqanngitsoq.
KANUKOKA-p kaammattuutigaa sumiiffinni sinniisunut ilaasortat aamma kommunalbestyrelsinut ilaasortaasinnaassasut, najukkani sunniuteqaqataasinnaanerup nukittorsarneqarnissaa siunertarerpiarlugu.
Ad. Siunnersuummi immikkoortoq 5.
Siunnersuutip immikkoortuani 5-imi ilaatigut allassimavoq sumiiffinni aqutsisut isumaqatigiissutitigut pisussaaffilersorsinnaatitaassanngitsut. Tamanna siunnersuutip immikkoortuanut 11-mut naapertuussorinanngilaq, tassani allassimammat kommunalbestyrelse aningaasanik sumiiffinni aqutsisut siunertanut aalajangersimasunut atugassaannik illuartitsisinnaasoq.
Sumiiffinni aqutsisut aningaasanik siunertanut aalajangersimasunut atugassinneqarsinnaassagunik soorunami aamma isumaqatigiissutitigut pisussaaffilersorsinnaassapput.
Taamaattumik kaammattuutigissavarput siunnersuutip immikkoortua 5 allanngortinneqassasoq erseqqissarneqassasorluunniit.
Ad. Siunnersuummi immikkoortoq 6.
Siunnersuutip immikkoortuani 6-imi allassimavoq kommunalbestyrelse aalajangersinnaasoq sumiiffinni sinniisut ataatsimiinnersiaqartitaassanersut sulinermilu akissarsianik annaasaqaatisiaqartitaassanersut, kiisalu tamakku pillugit Naalakkersuisut erseqqinnerusunik malittarisassiussasut.
Taamatut oqaasertaliineq isumaqarpat kommunip akiliissanerluni nammineq aalajangigassarigaa, taava ilimagisariaqarpoq aamma kommune aalajangiisinnaassasoq ataatsimiinnerit amerlanerpaamik qassit akissarsiaqaataassanersut, taamaalilluni kommunalbestyrelse periarfissaqassalluni sumiiffinni sinniisoqarnermut aningaasartuutinik aqutsinissaminut.
Periarfissatut allatut isumaliutigisariaqarpoq ataatsimiinnersiuteqartitsinani aammalu sulinermi akissarsianik annaasaqaatisiaqartitsinani aalajangersimasumik akissaateqartitsinissaq, tassa sumiiffinni sinniisut qasseriarlutik ataatsimiittarnissartik namminneq aalajangersinnaassappassuk ataatsimiinnersiuteqartitsinissaq sulinermilu akissarsianik annaasaqaatisiaqartitsinissaq aalajangersimasumik akissaateqartitsinermit akisunerulersinnaammat.
Ad. Siunnersuummi immikkoortoq 7.
Siunnersuutip immikkoortuani 7-mi allassimavoq sumiiffinni sinniisunut ilaasortat amerlassusissaat kommunalbestyrelsimit aalajangerneqassasoq ilaasortalli tallimanit amerlanerussanngitsut.
Sumiiffiit tamakkiisumik peqataatitaqarsinnaanissaat qulakkeerniarlugu aammalu sumiiffinni sinniisut suliassaasa assigiinngitsorujussuusinnaanerat eqqarsaatigalugu, taamalu sumiiffinni sinniisunut ilaasortaatitaqarnissamik pisariaqartitsinerup assigiinngisitaartorujussuusinnaajumaarnera pillugu, aalajangersagaq taanna eqaannerusariaqarpoq.
Taamaattumik kommuneqarfiit kattuffiata kaammattuutigissavaa sumiiffinni sinniisunut ilaasortat tallimanit amerlanerungaatsiarsinnaatitaassasut.
Ad. Siunnersuummi immikkoortoq 11.
Siunnersuutip immikkoortuani 11-mi allassimavoq sumiiffinni sinniisut ingerlaavartumik minnerpaamillu qaammatit tamaasa akiligassat, bankit karsillu allagartaannik nassiussisassasut aningaasat atugassiissutaasut qanoq atorneqarsimanerannut uppernarsaatitut.
KANUKOKA isumaqarpoq sumiiffinni sinniisut suliassaqarfiit aalajangersimasut iluanni siulersuisutut atuuttariaqartut. Taamaattumik allaffissornikkut suliassaviit, soorlu aningaasartuutinik naatsorsuusiorneq, kommunimi atorfillit suliarisariaqarpaat suliassanik ingerlatsisuiugamik.
