Ikaarsaariarnermi ataatsimiititalianut tusarniaassutigalugu nassiunneqarpoq kommunit aqunneqarnerat pillugu Inatsisartut inatsisissaattut (Aqutsinermut inatsisissatut) siunnersuut.

Inatsisissatut siunnersuut Inatsisartut 2008-mi upernaakkut ataatsimiinneranni oqaluuserissamaarneqarsimagaluarpoq tusarniaassutigineqareersorlu tunuartinneqarallarluni. Una tooruk siunnersuut siulleq tusarniaanermilu qanoq oqaaseqarfigineqarsimanersoq paasisaqarfigiumallugu.

Maanna inatsisissatut siunnersuut allanngortitaq nassiunneqarsimavoq 2008-mi ukiakkut oqaluuserineqarnissaa siunertaralugu.

Illoqarfinni najukkami aqutsisunik, lokalrådinik, pilersitsinissaq maanna periarfissinneqarpoq.

Kommunalbestyrelsinut ilaasortat akissaataannut tunngatillugu siunnersuutigineqarpoq akissaatit kommunalbestyrelsimut ilaasortaanermut tunngatillugu sulianut matussutissaassasut, tassa kommunalbestyrelsimi ataatsimiinnernut, ataatsimiititaliani ataavartuni ataatsimiinnernut, ataatsimiinnernut piareersarnernut, kommunip suliassaataanut allanut peqataanernut, pikkorissarnernut isumasioqatigiinnernullu peqataanernut, nunaqarfinnut illoqarfinnullu tikeraarnernut il.il.

Ataatsimiititalianut ataavartunut siulittaasuunermi tapisiaqarnissamut periarfissaqartuassaaq.

Siunnersuutip kingunerisaanik akissaatit pillugit nutaamik nalunaarusiortoqartariaqassaaq. Akissaatit pillugit nalunaarut nutaaq ukiap ingerlanerani Ikaarsaariarnermi ataatsimiititalianut tusarniutigineqassamaarpoq taamalu 1. januaari 2009-miit atulissangatinneqarluni.

KANUKOKA kingusinnerpaamik 6. juuli 2008 tusarniaanermut akeqquneqarpoq, taamaattumillu Ikaarsaariarnermi ataatsimiitaliat tusarniaanermut akissutitik KANUKOKA-mut kingusinnerpaamik sisamanngornermi 3. juuli 2008 nassiutereersimasariaqarpaat.